Նարեկ Բավեյան. «Ուզում եմ զուգերգ ունենալ ոչ ստանդարտ ու հետաքրքիր մի դեմքի հետ»

«Իմ մասնագիտությունն ինձ շատ հոգեհարազատ է: Ինձ հետաքրքրող ու հաճելի այլ շատ զբաղմունք կարող է ունենամ, բայց երգն ու երգարվեստն ինձ համար անփոխարինելի են: Ինչ վերաբերում է հաղորդավարական աշխատանքին, ասեմ, որ հեռուստատեսությունը միշտ էլ հեռու չի եղել իմ գործունեությունից: Հաղորդում վարելու առաջարկը ստացել եմ Սուրեն Թադևոսյանից: Իհարկե, սիրով համաձայնվեցի, քանի որ գոնե մինիմալ համոզված էի հայերեն գրագետ խոսելու իմ կարողության վրա, ասում եմ մինիմալ, որպեսզի անհամեստ չհնչի”,- համեստորեն պատասխանեց Նարեկը:

Ի դեպ հաղորդավարությունը միակ աշխատանքը չէ, որ Նարեկը ցանկացել է փորձել: «Կինոյի հետ կապված կոնկրետ բան ասել չեմ կարող, ժամաակին շատ եմ ցանկացել խաղալ ֆիլմերում: Բայց որքան ես ավելի շատ եմ փորձ ձեռք բերում, այնքան համոզվում եմ, որ ավելի խստապահանջ եմ դառնում ինքս իմ նկատմամբ: Եթե 5-6 տարի առաջ առանց երկար – բարակ մտածելու կհամաձայնեի խաղալ ֆիլմում եղած առաջարկի դեպքում, ապա հիմա, եթե միանշանակ համոզված չլինեմ, որ ինչպես հարկն է կարող եմ կատարել ինձանից պահանջվածը, չեմ համաձայնի»,- ավելացրեց հաղորդավար, երգիչ Նարեկ Բավեյանը:

Նարեկը ArmStar.am-ի հետ զրույցում նշեց, որ պատրատակամ է լսել նաև հարազատ մարդկանց խորհուրդներն ու քննադատությունները. «Ես ունեմ հարազատ մարդիկ, ում կարծիքն ինձ չի կարող վիրավորել, ընդհակառակը, ես այդ կարծիքի հետ հաշվի կնստեմ: Բայց, ընդհանուր առմամբ, ասեմ, որ իմ առաջին քննադատն ու խորհրդատուն ես ինքս եմ»:

Բացի ամեն օր եթերին նախապատրաստվելուց`Նարեկը նաև հասցնում է ուշադրություն դարձնել բոլոր այն ոլորտներին ու գործերին, որոնք նա դեռ չի արել: Օրինակ, Նարեկը դեռ երբևէ զուգերգով հանդես չի եկել: ArmStar.am-ին հետաքրքրեց, թե երբևէ մտածել է այս ուղղությամբ. «Մի բան, որ երկար ժամանակ չի լինում, սկսում ես ավելի լուրջ վերաբերվել դրան: Քանի որ իմ երգացանկում զուգերգեր չեն եղել, ես ուզում եմ, որ դա լինի տարբերվող, ոչ ստանդարտ, վառ ու հետաքրքիր մի դեմքի հետ: Արդեն մտածել եմ այդ ուղղությամբ, բայց առայժմ փակագծերը բացել չեմ ցանկանում»:

Նարեկի երգացանկում առաջիկայում սպասվում են նաև նոր երգեր ու տեսահոլովակներ, որոնց մասին դեռ խոսելը վաղ է. «Նոր տեսահոլովակ իմ երկրպագուների դատին կհանձնեմ մոտ երկու-երեք ամսից»,-ավելացրեց Նարեկ Բավեյանը:

Զրուցեց Աշխեն Մնացականյանը:

ArmStar.am