Տեղադրվեց 1713-րդ խաչը

Օգոստոսի 17-ին ԱԻ նախարար Ա. Երիցյանը մասնակցեց Երևան-Ապարան ճանապարհին «Տառ-Քարերի» պուրակի մոտ գտնվող բլրին տեղակայված «Սուրբ Խաչի» վրա 1713-րդ խաչի տեղադրմանը:

Միջոցառմանը ներկա էին Ամենայն Հայոց կաթողիկոս Գարեգին Բ-ն, ՀՀ գլխավոր դատախազ, «Նիգ-Ապարան» հայրենակցական միության պատվավոր նախագահ Աղվան Հովսեփյանը, ՀՀ Կառավարության անդամներ, ՀՀ Ազգային ժողովի պատգամավորներ, մարզպետներ, բազմաթիվ հյուրեր:

Ի պատասխան լրագրողների հարցերին՝ նախարար Ա. Երիցյանը մասնավորպես նշեց, որ քրիստոնեությունը մեր էությունն է, մեր հավատամքը, և մենք ազգովի պետք է ցույց տանք և ապացուցենք մեր քրիստոնյա լինելը, և արդեն ավանդույթ դարձած այս միջոցառումը ևս մեկ քայլ է դրան ընդառաջ:

«Սուրբ Խաչ»-ը հյուսված է 1712 մեծ ու փոքր մետաղական խաչերից, որոնք խորհրդանշում են քրիստոնյա Հայաստանի տարիքը: Այս տարի «Սուրբ Խաչ»-ի վրա տեղադրվեց 1713-րդ խաչը: Այն օծվեց ու հրշեջ-փրկարարական մեքենայի սանդղակով, փրկարարի հզոր բազկի վրա վեր խոյացավ դեպի երկինք, հանգրվանեց ու ձուլվեց հազարի մեջ՝ դառնալով մի ամբողջություն:

«Սուրբ Խաչ»-ի համար որպես պատվանդան ծառայող քարակերտ մատուռի բարձրությունը՝ 301 սմ է, որն էլ հիշատակում է 301թ.-ին քրիստոնեությունը Հայաստանում պետական կրոն ընդունելու տարեթիվը: «Սուրբ Խաչ»-ը քառաթև է և յուրաքանչյուր թևի տակ տեղակայված են 4 մատուռներ՝ մոմավառության սեղանիկներով: «Սուրբ Խաչ»-ի կառուցումը հատուկ գլանաձև խողովակներով նույնպես յուրահատուկ իմաստ ունի, քանզի գլանաձև խողովակները ձայնային էֆեկտներ արձակելու հնարավորություն ունեն և տարբեր ուժգնության քամիների ժամանակ տարբեր ձայնային հնչերանգներ են արձակում, որը հիշեցնում է եկեղեցական երգեհոնային երաժշտություն: