Անվավեր մեռելներ

Երեկ երեկո ուշ ատեն Երևանի գաղթականական կոմիտեն վերին Երուսաղեմեն (երկնային թագավորության մայրաքաղաք) ստացավ սա հեռագիրները (ուշացած).

Իրիկնամուտ. – Մենք ստվար խումբ մը գաղթականներ կգտնվինք շատ անմխիթար վիճակի մեջ: Մինչև օրս մեզ չի հաջողված ահեղ դատաստանին ներկայանալ: Մեր բոլոր թուղթերը նախադաս ատյանին մեզի կվերադարձվին սա պատճառաբանությամբ, թե բոլոր անոնք, որք Երևանի հիվանդանոցներուն մեջ ձրի բժիշկներուն հսկողության տակը մեռած են, անոնց մահը վավերական չի կրնար սեպվիլ: - Այս բանի պատճառը մինչև օրս անհայտ կմնա մեզի, միայն անցողակի կխոսվի, իբրև թե այս արգելքը կրնա ըլլա այն խուզարկության, որ կատարելով երկնային ոստիկանությունը` Երևան է բերած քանի մը մեռելոց մեջ կյանքի մնացորդներ … Հոս զայրույթով կխոսվի բժիշկներու մասին: Բայց մեռյալ հասարակության գիտակից մասը չի բաժներ այս զայրույթը: Վասնզի ի՞նչ խիղճով մեղադրել այդ անխոնջ մշակներուն, որք ժամը երկունքեն մինչև երեքին քառորդ մնացած, հիվանդանոց-կայարանին մեջ զբաղված են հարյուրավոր մեռելներ ճամփու դնելով, և, եթե անուշադրութենեն քանի մը մեռելի մեջ ալ քչիկ մը կյանք է սպրդել, բժի՞շկն է մեղավոր, մեռելային ազնվությա՞նն ինչ է եղեր: Եթե ազնիվ մեռելը պարզապես հայտնելու ըլլար բժշկին թե` պարոն, սխալմամբ իմ մեջս կյանք մոռցած եք, բժիշկը միթե պիտի ծուլանա՞ր հանել զայն: Ոչ, բնավ երբեք: Կբողոքենք այս անարդար հարձակմանը դեմ:

Կես գիշեր. (Ուշացած): Հուսահատությունը ալ ծայր չունի: Դատավորին տանը առջև կտիրե անասելի շփոթ մը: Ոստիկանությունը իր հետզհետե շարունակվող խուզարկությանց մեջ դուրս է բերեր ամբողջ կյանքի պահեստներ երիտասարդ ննջեցելոց մեջ: Երկնային դատարանով 113 մեռելներ ցմահ կյանքի դատապարտվեցան. 123 արհեստավորներ ղրկվեցան Երևանի սրճարանները տաժանակիր … պարապության: Ի՞նչ ընելիքներս բոլորովին չգիտենք, կեցած տեղներնիս ալ վտանգավոր դարձած է: Ի տես այս անհուսալի կացության` մեզմե խումբ մը երիտասարդ-գաղթականներ որոշում կայացած են վերադառնալ ու … նորեն մեռնել, այս անգամ արդեն փաստացի: Բայց ասիկա ամենուն մատչելի միջոց մը չէ: Մեզ համար, օրինակ, կխորհինք, բավականին դժվար պիտի ըլլա. նախ այն պատճառով, որ մեր, մեռելներուս անունը նպաստից տետրակեն դուրս նետված է, հետևաբար վերադարձի պարագային անոթութենեն պիտի … ապրինք: Երկրորդ. կմտածենք, քահանաները պիտի սպասե՞ն, որ հավեսով մեռնինք ու իրենց շահերուն դեմ չե՞ն հռչակելու մեր դանդաղությունը, ինչպես այդ տեսանք առաջին մեռնելու ատենը: Երրորդ և ամենեն գլխավորը` նպաստաբաշխ մարմինը պիտի համաձայնի՞ երկրորդ պատան մըն ալ տրամադրել մեռյալներուս ճիշտ այն պահուն, երբ կենդանյաց մեկ-մեկ շապիկ և երկուսին մի վարտիք միայն կտրամադրե: Արդ քանի չեն լուծված այս եռակի, մեկը մյուսեն կարևոր հարցերը, մենք չենք կարող հետևիլ ետադարձ շարժման մը, որ կրնա աղետաբեր հետևանքներ ունենալ:

Լեռ Կամսար «Անվավեր մեռելներ»

Նյութը` Ք. Ա.-ի: