Արթուր Աբրահամ. Հենրիխ Մխիթարյանը ազգային հերոս է, նա կդառնա երկրորդ Մեսսի

Հայաստանի ազգային հավաքականի և Դորտմունդի «Բորուսսիայի» կիսապաշտպան Հենրիխ Մխիթարյան և Գերմանիան ներկայացնող հայազգի բռնցքամարտիկ Արթուր Աբրահամ. երկուսն էլ սպորտային ասպարեզում հայտնի դեմքեր, ծնունդով՝ Հայաստանից, երկուսի տունն էլ այժմ Գերմանիան է: Գերմանական «Bild» պարբերականը հարցազրույց է անցկացրել 33-ամյա բռնցքամարտիկի և հայազգի ֆուտբոլիստի հետ:

«Bild». Պարոն Մխիթարյան, Արթուրն օգոստոսի 24-ին մենամարտելու է Վիլբեֆորս Շիհեպոյի հետ: Դուք ռինգում Աբրահամի հետ մի քանի ուսումնական ռաունդ կմենամարտեի՞ք:

Մխիթարյան. Այո՛, ինձ թվում է դա բավական հետաքրքիր կլիներ: Հայաստանում բոլորը գիտեն Արթուրին: Ես միշտ հպարտացել եմ նրանով:

Աբրահամ. Ես Հենրիխին թույլ կտայի բոլոր 12 ռաունդները ռինգում անցկացնել: Վերջում մենամարտը ոչ-ոքի կավարտվեր: Ցավոք, ես և Հենրիխը դեռ չենք հանդիպել, բայց ամեն ինչ պետք է փոխվի: Հենրի՛խ, շաբաթ օրը հրավիրում եմ իմ մենամարտին: Կգա՞ս:

Մխիթարյան. Միգուցե:

«Bild». Արթուրի իսկական անունն Ավետիս Աբրահամյան է: Դուք ևս այդպիսի մականուն վերցրեք: Օրինակ՝ Հենրիխ Մյուլլեր…

Մխիթարյան. (Ծիծաղում է).Ո՛չ, չեմ ուզում: Ես շատ գոհ եմ իմ անունից:

«Bild». Արթու՛ր, Հենրիխը Հայաստանում ի՞նչ կարգավիճակ ունի:

Աբրահամ. Նա ազգային հերոս է: Եվ նա դեռ առաջխաղացման տեղ ունի: Դորտմունդը կարող է ուրախանալ: Հենրիխը կդառնա երկրորդ Մեսսին:

«Bild». Ո՞ր մարզաձևն է ավելի կոշտ՝ ֆուտբո՞լը թե բռնցքամարտը:

Մխիթարյան. Բռնցքամարտը։

Աբրահամ. Ես սիրում եմ ֆուտբոլ խաղալ: Ինձ համար դա զվարճալի սպորտաձև է: Իմ մարզիչ Ուլլի Վեգները միշտ խաղում է մրցակից թիմի կազմում: Եթե նա արդար է խաղում, իմ թիմը միշտ հաղթում է (ծիծաղում է):

«Bild». Արթուրը մրցումներից առաջ միշտ քաշը պահպանելու խնդիրներ է ունենում: Ի՞նչ կասեք գերմանական ուտեստների մասին:

Մխիթարյան. Տեղի սննդամթերքն ինձ համար դեռ անսովոր է: Բայց գերմանական գարեջուրը հիանալի է: Ես փորձում եմ միշտ վերահսկել իմ քաշը, այդ հարցին պրոֆեսիոնալ մոտեցում ունենալ՝ որպես մարզիկ:

«Bild». Ի՞նչ կարող եք սովորել Արթուրից: Գերմաներեն լեզու՞ն:

Մխիթարյան. Շաբաթական երեք օր հաճախում եմ գերմաներենի դասերի:

Աբրահամ. Ամեն ինչ շատ արագ կանցնի: Միկին շատ խելացի տղա է, նա արդեն տիրապետում է 5 լեզուների՝ հայերեն, ռուսերեն, անգելերեն, ֆրանսերեն, պորտուգալերեն: Այստեղ ես ոչ մի խնդիր չեմ տեսնում:

«Bild». Արթուրը հայտնի է իր մեծ սրտով: Նա Հայաստանում աջակցում է բազում սոցիալական նախագծերի: Դուք նույնպե՞ս:

Մխիթարյան. Ես արդեն օգնել եմ անօթևան երեխաների իմ հայրենիքում: Օրինակ՝ հագուստներով:

Allsport.am