Ստեղծվել է «Հայաստանի պահածոյագործների և հյութ արտադրողների» միություն

ՀՀ գյուղատնտեսության նախարարությունում այսօր կայացավ հիմնադիր ժողով, որն ազդարարեց «Հայաստանի պահածոյագործների և հյութ արտադրողների» միության ծնունդը: Մինչ պայմանագրի ստորագրումն ու կանոնադրության հաստատումը գյուղատնտեսության նախարար Սերգո Կարապետյանը ողջունել է վերամշակող ճյուղի ընկերությունների միավորման գաղափարը՝ նշելով, որ վերամշակող ճյուղը արդյունաբերական գյուղատնտեսության անցնելու ճանապարհին լոկոմոտիվի դերակատարում ունի, իսկ Հայաստանի գյուղատնտեսության՝ կայունացման փուլից դեպի զարգացման փուլ անցման ճանապարհին խիստ կարևոր է, որպեսզի վերամշակողներն այս փուլ մտնեն ավելի համախումբ: «Գյուղմթերքի արտադրման համակարգի բարելավումը պահանջում է ավելի հուսալի գործող վերամշակում, շուկաների նկատմամբ ավելի ճկուն կողմնորոշում, ավելի մեծ ուշադրություն արտադրանքի որակի վրա, ինչը հնարավոր կլինի կազմակերպել միայն խոշոր միությունների և ընդգծված կոորպորատիվ շահերի դեպքում»,- ասել է Սերգո Կարապետյանը՝ մատնանշելով եվրոպական զարգացած երկրների փորձը:

Նախարարը նաև շեշտել է, որ նոր կազմավորվող գյուղացիական կոոպերատիվների հետ ավելի պաշտպանված և քաղաքակիրթ իրավահարաբերությունների համար հրատապ է դառնում վերամշակողների մեկ խոշոր իրավաբանական անձ լինելու հանգամանքը: Այնուհետեւ 26 վերամշակող ընկերություններ, ինչպես նաև Հայաստանի ազգային ագրարային համալսարանը ստորագրել են միության մեջ ներգրավվելու պայմանագիրը, հաստատել կանոնադրությունը, բաց քվեարկությամբ ընտրել միության նախագահին, ով երկամյա նշանակմամբ կփոփոխվի ռոտացիոն կարգով:

Նորաստեղծ միությունը հռչակել է իր նպատակները, որը վերաբերում է ինչպես պտուղ-բանջարեղենային պահածոների, հյութերի որակի և անվտանգության ապահովմանը, նպատակային շուկաներում համատեղ ջանքերով հայկական արտադրանքի վարկանիշի առաջընթացին, այնպես էլ ոլորտի օրենսդրության բարելավմանը, միջազգային մասնագիտացված ցուցահանդեսների, գիտաժողովների և ֆորումների ներգրավմանը: Նախարարը շնորհավորել է միության ստեղծումը, նրա նորանշանակ նախագահ Երվանդ Թահվերդյանին՝ մաղթելով արդյունավետ աշխատանք: