Արթուր Աբրահամ. Եթե պարտվեմ Շիհեփոյին, կհեռանամ բռնցքամարտից

Գերմանիայի դրոշի ներքո հանդես եկող հայ պրոֆեսիոնալ բռնցքամարտիկ, գերմիջին քաշային կարգում աշխարհի նախկին չեմպիոն Արթուր Աբրահամը (36-4, 21) ռինգ է վերադառնալու օգոստոսի 24-ին. մենամարտը կկայանա Գերմանիայի Շվերին քաղաքում:

Աբրահամը մենամարտելու է 30-ամյա նամբիացի Վիլբեֆորս Շիհեփոյի (20-6, 15) հետ: Գրում է Armsport.am-ը:

Արթուր Աբրահամը այսօր` օգոստոսի 21-ին, Շվերինում կայացած մամլո ասուլիսի ժամանակ հանդիպել է Վիլբեֆորս Շիհեփոյին, հաղորդում է հայ բռնցքամարտիկի մամուլի ծառայությունը:

«Ամեն ինչ կանեմ՝ հաղթելու համար: Եթե պարտվեմ, կհեռանամ բռնցքամարտից: Չեմ թերագնահատում Շիհեփոյին, սակայն վստահ եմ, որ հաղթելու եմ»,- ասել է Արթուր Աբրահամը:

Աբրահամ- Շիհեփո մրցելույթը կցուցադրվի գերմանական ARD հեռուստաալիքով, ինչպես նաև Հայաստանի հանրային հեռուստաընկերության ուղիղ եթերում: