Պանթեոնի մոտ գտնվող հացատունն ապամոնտաժվեց. Երևանի քաղաքապետը կատարեց իր խոստումը

Կոմիտասի անվան այգու պանթեոնի հարակից տարածքում գտնվող հացատան առկայությունը հաճախ է քննարկման առարկա դարձել ինչպես շարքային երևանցիների, այնպես էլ մտավորականների կողմից, ովքեր մշտապես բարձրացրել են տվյալ կառույցի ապամոնտաժման հարցը։

Այս մասին HayNews.am-ին ասաց Երեւանի քաղաքապետարանի հասարակության հետ կապերի վարչության պետ Արթուր Գեւորգյանը։

Ըստ նրա՝ հնչող հիմնավորումները տեղին էին, հատկապես հաշվի առնելով, որ հայոց մեծերի վերջին հանգրվանը դարձած պանթեոնի հարակից տարածքին անհարիր է նման օբյեկտի առկայությունը։

«Հարցը քանիցս բարձրաձայնվել էր նաև քաղաքապետ Տարոն Մարգարյանի հետ մշակութային գործիչների ունեցած տարաբնույթ հանդիպումների շրջանակում, ինչին ի պատասխան քաղաքապետը խոստացել էր անպայման անդրադառնալ հարցին։ Ըստ այդմ, քաղաքապետի նախաձեռնությամբ դեռևս 2012 թվականի հոկտեմբերի սկզբին մշակվեց Կոմիտասի անվան այգու պանթեոնի հարակից տարածքի համալիր բարեկարգման ծրագիր, որի շրջանակում հարց դրվեց վերանայել նաև գործող օբյեկտի հետագա գործունեության նպատակահարմարությունը։ Հաշվի առնելով, որ տարածքում իրականացվելու էին նաև Կոմիտասի անվան թանգարանի կառուցման աշխատանքներ, քաղաքապետ Տարոն Մարգարյանի հանձնարարությամբ մեկնարկեցին սեփականատիրոջ հետ բանակցություններ՝ գործող հացատան ապամոնտաժման ուղղությամբ։ Արդյունքում՝ 2013թ. օգոստոսին, պայմանավորվածություն ձեռք բերվեց կառույցն ապամոնտաժելու և տարածքը համայնքին վերադարձնելու վերաբերյալ»,- ասաց նա։

Ա. Գեւորգյանի խոսքերով՝ ներկայում ընթանում են Կոմիտասի անվան այգու պանթեոնի հարակից տարածքի օբյեկտի ապամոնտաժման աշխատանքները, որի ավարտից հետո արդեն իսկ մշակված համալիր բարեկարգման նախագծի համաձայն կիրականացվի տարածքի բարեկարգումն ու կանաչապատումը։