Գարեգին Բ-ն ընդունեց երիտասարդական կազմակերպությունների ներկայացուցիչներին

Օգոստոսի 21-ին Մայր Աթոռ Սուրբ Էջմիածին էին այցելել շուրջ 200 երիտասարդներ` շնորհաւորելու Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսին ծննդեան տարեդարձի առիթով եւ իրենց հաւատարմութիւնը, նուիրուածութիւնն ու զօրակցութիւնը յայտնելու Հայ Եկեղեցուն: Երիտասարդները ներկայացնում էին «Հայ Եկեղեցու երիտասարդաց միավորումը», «Մայր Աթոռի Քարոզչական կենտրոն» խումբը, «Եկեղեցասէր երիտասարդներ» կառոյցը, բուհական երիտասարդական միութիւնները, Մայր Աթոռի «Մանանայ» երիտասարդական-քրիստոնէական ծրագիրը, ինչպէս նաեւ «Սփիւռքահայ ուսանողների խորհուրդը», «Ռուսաստանի հայերի միութեան» եւ «Համաշխարհային հայկական կոնգրէսի» երիտասարդաց կազմակերպութիւնը, «Սերունդ», «Երիտասարդութիւն», «Երիտասարդներ յանուն ապագայի» հասարակական կազմակերպութիւնները:

Հանդիպումը սկսուեց Տէրունական աղօթքով, ապա ՀԵԵՄ հոգեւոր պատասխանատու Տ. Եղիշէ վարդապետ Աւետիսեանը եկեղեցասէր երիտասարդների անունից շնորհաւորեց Հայոց Հայրապետին ծննդեան 62-րդ տարեդարձի առիթով: Երիտասարդական կառոյցների ողջոյններ եւ բարեմաղթանքներ Նորին Սրբութեանը փոխանցեցին նաեւ տարբեր կազմակերպութիւնների պատասխանատուները: Այնուհետեւ հոգեւոր երգերի կատարումներով հանդէս եկաւ նորաստեղծ «Հաւատամք» երգչախումբը:

Վերջում երիտասարդներին իր օրհնութիւնը բերեց Ամենայն Հայոց Կաթողիկոսը: Նորին Սրբութիւնը իր գնահատանքը յայտնեց երիտասարդներին` Հայ Եկեղեցու շուրջը համախմբուելու, Եկեղեցու հոգեւոր առաքելութեան իրականացմանն աջակից լինելու համար` արձանագրելով, որ ազգի շարժիչ ուժը` երիտասարդութիւնը, նախանձախնդիր է իր Եկեղեցու կեանքի նկատմամբ, հաւատարիմ` հայրերի սուրբ հաւատքին ու ժառանգութեանը, նուիրական սրբութիւններին ու աւանդոյթներին: Նշելով, որ Հայրենիքը զօրանում եւ Եկեղեցին փառաւորւում ու պայծառակերպւում է, երբ աստուածահաճոյ կեանքով է ապրում ողջ ազգը, նրա բոլոր զաւակները` Վեհափառ Հայրապետը յորդորեց երիտասարդներին միշտ Եկեղեցու օրհնութեան ներքոյ մնալ եւ մասնակիցը դառնալ Եկեղեցու առաքելութեանը` ժողովրդին քրիստոնէական արժէքներով առաջնորդելու, նրա կեանքն այդ արժէքների վրայ խարսխելու: Ամենայն Հայոց Կաթողիկոսը պատգամեց երիտասարդներին իրենց աղօթքով, հաւատով եւ գործերով միշտ պայծառ ու շէն պահել մեր սուրբ Եկեղեցին:

Վերջում Ամենայն Հայոց Հայրապետը պատասխանեց երիտասարդներին յուզող հարցերին, որոնք առնչւում էին Եկեղեցու առաքելութեան իրականացման ճանապարհին երիտասարդների հնարաւոր աջակցութեանը, Եկեղեցու առջեւ ծառացած մարտահրաւէրներին ու դրանց յաղթահարման գործում երիտասարդութեան ներգրաւուածութեանը:

Հանդիպմանը ներկայ էին Մայր Աթոռի դիւանապետ Տ. Արշակ եպիսկոպոս Խաչատրեանը, Մայր Աթոռի կրթական հաստատութիւնների վերատեսուչ Տ. Գեւորգ եպիսկոպոս Սարոյեանը, երիտասարդական խմբերի պատասխանատուներ Տ. Երեմիա աբեղայ Աբգարեանը, Տ. Թովմայ աբեղայ Խաչատրեանը, Տ. Յակոբ քահանայ Խաչատրեանը եւ Գեղամ սարկաւագ Աւետիսեանը: