Փորձի փոխանակումը Կառլովի Վարի եւ Ջերմուկի միջեւ արդյունավետ կլինի. Հերմինե Նաղդալյան

Ազգային ժողովի փոխնախագահ Հերմինե Նաղդալյանը օգոստոսի 22-ին ընդունեց Չեխիայի Հանրապետության Կառլովի Վարի երկրամասի նահանգապետ Յոզեֆ Նովոդնիին եւ Կառլովի Վարի քաղաքապետ Պետր Կուլհանեկին:

ԱԺ փոխնախագահը բարձր գնահատեց Հայաստանի եւ Չեխիայի միջպետական եւ միջխորհրդարանական հարաբերությունների ակտիվ զարգացումը եւ Չեխիայի աջակցությունը Հայաստանին միջազգային տարբեր հարթակներում: Նա կարեւորեց նաեւ համագործակցության ապակենտրոնացումը եւ երկու երկրների մարզային կառույցների ու քաղաքների փոխգործակցությունը: Դրա լավագույն օրինակներից մեկը Կառլովի Վարի եւ Վայոց ձորի համագործակցությունն է, որի գաղափարը ծնվել է ԱԺ նախագահ Հովիկ Աբրահամյանի՝ Չեխիա կատարած այցի շրջանակներում: Հերմինե Նաղդալյանը հույս հայտնեց, որ տարածքային կառույցների միջեւ սկիզբ առած համագործակցությունը, ինչպես նաեւ փորձի փոխանակումը առողջարանային քաղաքների՝ Կառլովի Վարի եւ Ջերմուկի միջեւ արդյունավետ կլինեն:

Կառլովի Վարի երկրամասի նահանգապետն ու քաղաքապետը նույնպես բարձր գնահատեցին երկու երկրների մարզերի ու քաղաքների միջեւ սկիզբ դրված համագործակցությունը՝ նկատելով, որ Ջերմուկն իր բարձրակարգ հանքային ջրերով, բնական գեղեցկությամբ ու օդի մաքրությամբ ունի զարգացման լուրջ հեռանկարներ, եւ իրենք պատրաստ են համատեղ ծրագրերով աջակցելու դրա իրականացմանը:

Վայոց ձորի մարզպետ Էդգար Ղազարյանը գոհունակություն հայտնեց չեխ գործընկերների աջակցության համար եւ տեղեկացրեց, որ Ջերմուկի եւ Կառլովի Վարի միջեւ համագործակցության հուշագիր է ստորագրվել, իսկ մարզերի միջեւ հուշագիրը մինչեւ տարեվերջ կստորագրվի Չեխիայում:

Հերմինե Նաղդալյանը հույս հայտնեց, որ համագործակցությունը օգտակար կլինի եւ՛ առողջարանային տնտեսության, եւ՛ տուրիզմի զարգացման առումով՝ հավաստիացնելով, որ ՀՀ Ազգային ժողովը պատրաստ է մշտապես աջակցելու կարեւոր այս ծրագրերի արդյունավետ իրականացմանը: