«BOSS»-ի շնորհիվ ահաբեկիչներն ակնթարթորեն կնույնականացվեն

ԱՄՆ-ի իշխանությունները մոտ են հետապնդման այնպիսի համակարգի ստեղծմանը, որը հնարավորություն կընձեռի մարդկային ամբոխի մեջ վայրկենապես նույնականացնել ցանկացած մարդու՝ արտաքին հսկիչ տեսախցիկների որսած տվյալների հիման վրա:

Ազգային անվտանգության նախարարությունն արդեն փորձարկել է այդ տեխնոլոգիան. հաղորդում է «The New York Time»-ը:

Համակարգը, որ դեռ լիարժեք կիրառման համար պատրաստ չէ, ստացել է «BOSS» (անգլերեն՝ Biometric Optical Surveillance System –հետապնդման բիոմետրիկ-օպտիկական համակարգ) անվանումը. հաղորդում է «ИТАР-ТАСС »-ը:

«BOSS»-ն ԱՄՆ-ի անվտանգության ծառայությունների աշխատակիցներին հնարավորություն կընձեռի ակնթարթորեն և մեծ ճշգրտությամբ ամբոխի մեջ նույնականացնել ահաբեկիչներին կամ հետախուզվող հանցագործներին:

Հաղորդագրությունը մասնավորապես նշում է, որ շնորհիվ նոր տեխնոլոգիայի, կնվազի ահաբեկչություն իրականացնելու հավանականության աստիճանը զանգվածային միջոցառումների անցկացման վայրերում: Սակայն, ինչպես նշում են իրավապաշտպանները, այդ նորույթը կարող է օգտագործվել նաև քաղաքացիների տոտալ հետապնդման համար:

Այսօր ԱՄՆ-ի խոշոր քաղաքների մեծ մասում ոստիկանության տրամադրության տակ կա արտաքին հսկողության տեսախցիկների լայն ցանց: Այպիսի սարքեր կան տեղադրված փողոցային լուսավորության սյուների վրա, շենքերի պատերին և այլ հարմար վայրերում: Ոստիկանությունը հաճախ անհրաժեշտ տվյալներ է ստանում նաև մասնավոր ընկերությունների, անվտանգության համակարգի մաս կազմող տեսանկարահանումների շնորհիվ: 

Գրում է «Փաստինֆո»-ն: