«Հրապարակ». Սայաթ-Նովա 12-ի պայքարը նոր փուլ է մտել. գործին ներգրավվել է ոստիկանությունը

Երեկ, ուշ երեկոյան զանգահարեցին Սայաթ-Նովա 12 եւ մոտակա շենքերի բնակիչները՝ խնդրելով հրապարակել, որ իրենց պայքարը, բակում կառուցվելիք շինության հետ կապված, նոր փուլ է մտել:

Հիշեցնենք, որ «Լեւոն թրավելի» շենքի բակում «Լարկո գրուպը» պատրաստվում է կառուցել 5 հարկանի շինություն, ինչի դեմ բողոքում են բնակիչները: Նրանք հասել էին շինարարության կասեցմանը: Իսկ պայքարի այս փուլն առանձնահատուկ է նրանով, որ գործին ներգրավվել է ոստիկանությունը:

Նախօրեին բնակիչներից 76-ամյա մի կնոջ տարել են ոստիկանություն եւ 6 ժամ պահել, որից հետո նրա առողջական վիճակը վատացել է: Իսկ երեկ ոստիկանությունն սկսել է խուզարկություններ անել պայքարող ակտիվիստների բնակարաններում: Կենտրոնի ոստիկանության քննչական բաժանմունքի քննիչ Մուշեղյանը, դատարանի որոշմամբ, գնացել է խուզարկություններ անելու:

Պարզվում է՝ կառուցապատողը դիմել է ոստիկանություն եւ հայտարարել, որ իր փաստաթղթերը կորել են կամ գողացվել, եւ դրա հիման վրա քրեական գործ են հարուցել: Դատարանն էլ խուզարկության սանկցիաներ է տվել: Եթե քրեաիրավական մեթոդները մինչ օրս կիրառվում էին քաղաքական դեմքերի, հիմա արդեն սկսել են կիրառվել իրենց իրավունքները պաշտպանել փորձող շարքային քաղաքացիների նկատմամբ:

Մանրամասն՝ «Հրապարակ»-ի այսօրվա համարում