Կրկին օֆշոր. «ռազբորկաներ» են ընթանում ամերիկահայ գործարարի և Արագած Ախոյանի միջև

Օֆշորային նոր սկանդալ է հասունանում: Ամերիկահայ գործարար, «Արցախբանկի» բաժնետեր, «Արարատ» ֆուտբոլայի ակումբի ղեկավարներից Հրաչ-Ներսես Կապրիելյանը, որոշ տեղեկություններով, Շվեյցարիայից «Արարատ» թիմում ներդրում կատարելու խոստումով մեծ գումարներ է հավաքագրել հայ համայնքից, բայց այդ գումարներն ուղարկել է օֆշորային գոտում իր բիզնես կազմակերպությանը: Այս մասին գրում է Մանրամասն՝ «Հրապարակ»-ը:

Հիշեցնենք, որ տեւական ժամանակ է' լուրջ «ռազբորկաներ» են ընթանում ամերիկահայ գործարարի եւ ԱԺ ԲՀԿ-ական պատգամավոր Արագած Ախոյանի միջեւ: Երբեմնի գործընկերներ Արագած Ախոյանի եւ Հրաչ-Ներսես Կապրիելյանի միջեւ աղմկահարույց սկանդալը սկիզբ է առել այն բանից հետո, երբ ամերիկահայ գործարարը փորձել է իրենց բռնած ընդհանուր գործից, առանց որեւէ հիմնավոր պատճառի դուրս մղել Ախոյանին՝ վերջինիս թողնելով զրոյական ֆինանսական հաշիվներով։ Ավելի ստույգ՝ դեռեւս 2002-ին Հրաչ-Ներսես Կապրիելյանը, չգիտես ինչու, որոշել է իր եւ Ախոյանի համատեղ ջանքերով հիմնած «Իտարկո Քոնսթրաքշն» ընկերության բաժնեմասերն ամբողջությամբ վերցնել՝ փորձելով «քցել» Ախոյանի մոտ մեկ քառորդ բաժնեմասը։ Ախոյան-Կապրիելյան մոտ 10-ամյա «մենամարտը» դեռ անավարտ է: Հրաչ-Ներես Կապրիելյանը, որին սկզբում Ախոյանը նվիրել էր իր բաժնեմասը, բայց հետո այն դատարանի միջոցով ետ էր ստացել, իր հերթին հայց է ներկայացրել Ախոյան ընտանիքի դեմ։ Հարուցված քրեական գործի շրջանակներում ջրի երես են դուրս եկել Կապրիելյանի կողմից թույլ տրված իրավախախտումները։

Որոշ տեղեկություններով, Հրաչ Կապրիելյանի մատը խառն է նաեւ ԲՀԿ-ական մեկ այլ պատգամավորի՝ Աշոտ Տոնոյանի (Տոնուսի Աշոտի) սնանկացման պատմության մեջ: «Տոնուս» ընկերությունը, ինչպես հայտնի է, բնակարանաշինության սկանդալի մեջ է վերջերս հայտնվել՝ շինարարությունը չի կարողանում ավարտին հասցնել, եւ բնակարանների սպասող անձինք անընդհատ բողոքի ակցիաներ են անում: Անավարտ շենքն այժմ «Արցախբանկում» գրավի տակ է: Այն նույն բանկում, որի 40 տոկոսի սեփականատերն է Կապրիելյանը:

Մանրամասն՝ «Հրապարակ»-ի այսօրվա համարում