Օգոստոսի 24-ին մահացել է հայ-հրեական ծագումով ռուս գրող Սերգեյ Դովլաթովը

«Փողն ինձ մոտ միանգամից վերջանում է, իսկ միայնությունը`  երբեք»:

Սերգեյ Դովլաթով

Հայ-հրեական ծագումով ռուս գրող Սերգեյ Դովլաթովը (Դովլաթյան) (ռուս.՝ Сергей Довлатов) ծնվել է 1941 թ. սեպտեմբերի 3-ին, Ուֆայում (Ռուսաստան)։

Սերգեյ Դովլաթովի հայրը ազգությամբ հրեա, թատերական ռեժիսոր Դոնատ Մեչիկն էր, իսկ մայրը` ազգությամբ հայ, գրականության սրբագրիչ, Նորա Սերգեի Դովլաթյանը։ 1944 թվականից Դովլաթովը ապրել է Լենինգրադում (Այժմ` Սանկտ Պետերբուրգ)։ 1959 թ. ընդունվում է Լենինգրադի Ժդանովի անվան համալսարանի լեզվաբանական ֆակուլտետ և սովորում երկուսուկես տարի, որտեղ և շփումներ է ունենում հանրաճանաչ գրողների և նկարիչների հետ, ինչպիսիք էին Եվգենի Ռեյնը, Իոսիֆ Բրոդսկին և ուրիշները։

Սերգեյ Դովլաթովը վախճանվել է 1990 թ. օգոստոսի 24-ին։ Թաղված է Նյու Յորքի Քվինսթաղամասի հրեական Մաունթ Հեբրոն գերեզմանատան հայկական մասում։

Սերգեյ Դովլաթով - Հրանտ Մաթևոսյան փոխհարաբերությունից

....

— Իսկ հիմա, հայաստանյան իրադարձությունների հետ կապված, ձեր հայկական արյունն իրեն զգացնել տալի՞ս է...

— Ես գիտեմ, որ ոմանց համար սա ահավոր խայտառակություն է, բայց երբեք զգացողություն չեմ ունեցել, որ ես ինչ-որ ազգության եմ պատկանում: Ես չեմ խոսում հայերեն: Մյուս կողմից, եբրայերեն ես նույնպես չեմ խոսում, հրեական միջավայրում ես ինձ յուրային չեմ զգում: Ու մինչև վերջերս ես հայերի դժբախտություններին նայում էի, ինչպես կնայեի ցանկացած այլ ազգերի` հնդիկների, չինացիների դժբախտություններին... Բայց վերջերս, մի գրական կոնֆերանսի ժամանակ ես ծանոթացա Հրանտ Մաթևոսյանի հետ: Նա ինձ բոլորովին նման չէ, նա իսկական հայ է, խելագարվում է այն ամենից, ինչ կատարվում է հայրենիքում: Նա այնքան ամաչկոտ, անկեղծ, բարի, հրեշտականման մարդ է, որ նրա հետ ընկերանալով, սկսեցի նայել այսպես ասած նրա աչքերով: Երբ կարդում եմ հայաստանյան իրադարձությունների մասին, ես պատկերացնում եմ, թե ինչ է զգում Մաթևոսյանը: Այ ասպես` նրա հանդեպ տածած սիրո միջոցով, իմ մեջ ինչ-որ հայկական զգացմունքներ առաջացան...

hrantmatevossian.org