Զավեն Անդրիասյանը շուտով իր խաղի երկրպագուներին կներկայացնի իր անակնկալը

Ճապոնիայի մայրաքաղաք Տոկիոյում ավարտված Մտավոր խաղերի ծրագրով Օլիմպիադայում գերազանց արդյունքներ է գրանցել այդ մրցաշարում Հայաստանի միակ ներկայացուցիչ, գրոսմայստեր Զավեն Անդրիասյանը: Ստուգատեսի արագ շախմատի մրցումներում, որն անցկացվել է օգոստոսի 16-18-ը և տևել 9-ը տուր, հայ տաղանդավոր շախմատիստը հաջողել է նվաճել ուժեղագույնի կոչումը: Իսկ, ահա, օգոստոսի 14-ին կայացած կայծակնային շախմատի մրցապայքարում, Զավենը դարձել է արծաթե մեդալակիր: Armsport.am-ը զրուցեց հայկական շախմատի ծագող աստղի՝ ծագող արևի երկրում ունեցած փայլուն հաջողությունների մասին:

- Զավեն, Տոկիոյի Օլիմպիադայի հավանական մասնակցության մասին մեզ հայտնեցիք Ձեզ հետ ունեցած վերջին զրույցում, որի առիթը Համաշխարհային ուսանողական խաղերում Ձեր` արծաթե մեդալակիր դառնալու փաստն էր: Փաստորեն, ամառային մրցանակային ավարին հավելեցիք ևս մեկ ոսկի և արծաթ: Շնորհավորում ենք և մաղթում, որ դրանք լինեն հերթականն ու արագորեն «մոռացվեն» նորերով…

-Շնորհակալություն: Այո, ինչպես նշել էի` մտադիր էի մասնակցել Ճապոնիայում արագ և կայծակնային մրցաշարերին, որոնք ինձ մոտ հաջող ստացվեցին և կարողացա մեդալներ նվաճել երկու մրցաշարերում էլ:

- Տեղյակ ենք, որ Տոկիոյի մրցաշարին մասնակցում էին 25 շախմատիստներ, որոնցից յուրաքանչյուրը, բացառությամբ Օլիմպիադայի տանտերերի (12 ներկայացուցիչ), ներկայացնում էր մեկ երկիր: Հայաստանի միակ ներկայացուցիչն էիք և, բնականաբար, մեծ էր պատասխանատվության գիտակցումն ու բեռը: Գիտենք, որ Ֆրանսիայի դրոշի ներքո հանդես էր գալիս Տիգրան Ղարամյանն, ով, նույնիսկ, արագ շախմատում երրորդ մրցանակակիր դարձավ: Ուրիշ ո՞ր երկրներից էին մասնակիցները, ի՞նչ կազմ էր հավաքվել Տոկիոյում:

- Տոկիոյում մասնակցում էին Ֆրանսիայից, որը, ինչպես նշեցիք, ներկայացնում էր հայ գրոսմայստեր Տիգրան Ղարամյանը, ինչպես նաև' Իսրայելից, Իրանից, Ադրբեջանից, Շվեյցարիայից, Մալազիայից, Ռուսաստանից, և, բնականաբար, տանտերերը: Անշուշտ, պատասխանատվություն' միշտ էլ կա, և փորձում եմ հնավորինս լավ խաղալ:

- Մրցաշարի մասին քիչ բան է հայտնի, համենայն դեպս, Հայաստանի մարզական շրջանակում: Ի՞նչ կարող եք ասել այդ առումով, Օլիմպիադան ավանդակա՞ն է, ինչ պարբերականությամբ է կազմակերպվում:

- Մրցաշարն առաջին անգամ էր անցկացվում, չէր լուսաբանվում, բայց որոշ տվյալներ կային: Կազմակերպիչներն ասացին, որ կփորձեն ավանդական դարձնել այն:

- Սկսենք կայծակնային մրցաշարից, որում փոխչեմպիոն հռչակվեցիք՝ զիջելով միայն իսրայելցի գրոսմայստեր Գոլոդին: Ի՞նչ կմանրամասնեք այդ ձևում կայացած մրցապայքարի մասին:

-Կայծակնայինում, մինչև վերջին տուրը, ունեի լավ հնարավորություններ` առաջին տեղը գրավելու, բայց իսրայելցի շախմատիստը շատ հաջող վիճակահանություն ստացավ և շատ դժվարացրեց իմ` առաջին տեղ գրավելու շանսերը: Ես փորձեցի պայքարել, բայց չստացվեց…

- Արագ շախմատում Դուք նվաճեցիք հաղթողի կոչումը՝ մահվան պարտիայում առավելության հասնելով իրանցի գրոսմայստեր Մաղամիի նկատմամբ: Ամեն ինչ արա՞գ ստացվեց, թե՞, բոլոր դեպքերում, ցանկացած հաջողության հիմքում դանդաղ, հետևողական աշխատանք կա…

- Արագ շախմատում, ինձ համար ավելի հաջող ընթացավ մրցաշարը: Մինչև վերջին տուրը իրանցի գրոսմայստերի հետ կիսում էինք առաջին հորիզոնականը: Լրացուցիչ ցուցանիշներով` ես առաջինն էի, բայց կազմակերպիչները նախատեսել էին մահվան պարտիա, որն, ի վերջո, հաջողեցի հաղթել:

- Գիտենք, որ առաջիկայում հետաքրքիր անակնկալ եք նախապատրաստել Ձեր խաղի երկրպագուների համար, որը մեկ այլ` ոչ պակաս ուշագրավ կարգավիճակով է բացահայտելու Զավեն Անդրեասյան շախմատիստին: Կբացե՞ք փակագծերը…

- Անցյալ տարվա վերջնամասում սկսել էի գիրք գրել շախմատային սկզբնախաղի մասին, որը լույս տեսավ այս տարվա մարտ ամսին: Այնուհետև «Շախմատային աշխարհ» կազմակերպությունից առաջարկ ստացա նաև գրել մեր երեխաների համար: Արդեն երկու գիրք պատրաստ է, որոնք, մոտ օրերս, կարող եք գնել Շախմատի տան «Շախմատի աշխարհ» խանութում:

- Ավանդական հարց. Ի՞նչ նոր հաջողություններ սպասենք Ձեզնից և երբ…

- Դե մոտակա մրցաշարս Մարտունիում կայանալիք «Սևանալիճ» ավանդական մրցաշարն է, որն անցկացվելու է սեպտեմբերի 7-17-ը: Կփորձեմ այնտեղ ևս լավ խաղալ: