«Շիրակ» - «Բանանց». խաղից առաջ

25 օգոստոսի, ժ.17:00, Գյումրի, Քաղաքային մարզադաշտ

Շատերի համար անսպասելի երկրի չեմպիոն «Շիրակն» անհաջող է մեկնարկել առաջնությունում` 2 հանդիպումներում վաստակելով ընդամենը մեկ միավոր: Մեկնարկային խաղում շիրակցիները Գյումրիում 2:3 հաշվով պարտվեցին «Գանձասարին», իսկ «Ալաշկերտի» հետ խաղում գոլային մի շարք պահեր ստեղծելով, չկարողացան հաղթանակ տոնել (1:1): Ինչ խոսք, «Շիրակն» այս խաղում ձգտելու է անպայման կորցրածը հետ բերել ու անդրանիկ հաղթանակը տոնել առաջնությունում:

Իսկ ահա «Բանանցը» նախորդ մրցաշրջանի համեմատ նոր գլխավոր մարզիչ Ժոլտ Հոռնյակի գլխավորությամբ հաջող է մեկնարկել և 4 միավորով առաջնության առաջատարներից մեկն է: Այնպես որ «Շիրակին» այսօր լուրջ փորձություն է սպասում:

Որքան էլ որ տարօրինակ է, մինչև անցած մրցաշրջանի մեկնարկը նախորդ 9 առաջնություններում «Բանանցը» «Շիրակի» համար դարձել էր ամենաանհարմար մրցակիցը: Թիմերի միջև կայացած 33 հանդիպումներում «Շիրակին» չէր հաջողվում հաղթել «Բանանցին»` այդ խաղերից միայն 10-ն ավարտելով ոչ-ոքի: Վերջին անգամ գյումրեցիները «Բանանցին» հաղթել էին 2003թ. ապրիլի 26-ին Երևանում կայացած խաղում: Հանդիպման ելքը վճռել էր Արարատ Հարությունյանի խփած միակ գնդակը: Ընդ որում 2005-2008թթ. շիրակցիները չափազանց անհաջող են հանդես եկել Երևանում' պարտվելով բոլոր 7 հանդիպումներում` այդպես էլ չգտնելով մրցակցի դարպասի բանալին, փոխարենը սեփական դարպասը բաց թողնելով 20 գնդակ: Իսկ ահա անցած մրցաշրջանում գյումրեցիները զգալի առավելության հասան «Բանանցի» նկատմամբ: Առաջին շրջանի խաղում 0:3 հաշվով պարտվելով «Բանանցին», հաջորդ 5 հանդիպումներում «Շիրակը» 3 անգամ հաղթող դուրս եկավ, 2 անգամ ոչ-ոքի արդյունք գրանցվեց: Շիրակցիներից այդ հանդիպումներում առավել աչքի ընկավ Ֆոֆանա Բեկոն` 4 անգամ գրավելով «Բանանցի» դարպասը:

2012թ. հունիսի 3-ին Գյումրիում կայացած խաղում շիրակցիներին վերջապես հաջողվեց խախտել տխուր ավանդույթն ու հաղթել 2:1 հաշվով: Մրցակիցների միջև 2013թ. ապրիլի 27-ին կայացած վերջին խաղում «Շիրակը» հաղթել է 2:0 հաշվով:

Մրցակիցների մրցավեճում բոլորից արդյունավետ են գործել «Բանանցի» հարձակվողներ Արամ Հակոբյանն ու Արսեն Բալաբեկյանը' խփելով 8-ական գնդակ: Շիրակցիներից լավագույն արդյունքն ունի Անդրանիկ Բարիկյանը, ով խփել է 5 գնդակ:

Աղբյուր` Armsport.am