Կարեն Ալեքսանյան. 200 խաղ «Շիրակի» մարզաշապիկով

«Բանանցի» հետ առաջնության 3-րդ տուրի հանդիպումը «Շիրակի» ամենափորձառու ֆուտբոլիստներից մեկի՝ 33-ամյա Կարեն Ալեքսանյանի հոբելյանական՝ 200-րդ խաղն էր բարձրագույն խմբում հարազատ ակումբի մարզաշապիկով: Ալեքսանյանը դարձավ ՀՀ առաջնություններում «Շիրակում» 200 խաղի սահմանագիծը հատած 11-րդ ֆուտբոլիստը:

ՀՀ առաջնություններին մասնակցած թիմերից և ոչ մեկում 200 խաղի սահմանագիծը հատած նման թվով ֆուտբոլիստներ հանդես չեն եկել: Ավելին, 22-րդ առաջնության մասնակից ակումբներից միայն «Փյունիկում» (Սարգիս Հովսեփյան' 365 խաղ, Արսեն Ավետիսյան՝ 208) և «Արարատում» են (Արթուր Մինասյան՝ 247) ֆուտբոլիստները հասել նման ցուցանիշի:

Բարձրագույն խմբում Կարեն Ալեքսանյանը ֆուտբոլային կարիերան սկսել է 1995/96թթ. առաջնությունում՝ հանդես գալով Գյումրիի «Արագածում»: 16-ամյա ֆուտբոլիստը թիմի կազմում նորամուտը նշեց 1996թ. մարտի 17-ին՝ «Ղարաբաղի» հետ խաղում փոխարինելով Վաչիկ Մնացականյանին: Այդ մրցաշրջանում Ալեքսանյանը 9 խաղ անցկացրեց առաջնությունում ու թիմի հետ տեղափոխվեց առաջին խումբ: Հետաքրքիր է, որ այդ ժամանակ «Արագածում» հանդես էին գալիս հետագայում «Շիրակում» երկար տարիներ խաղացած Վարդան Բիչախչյանը, Արտակ Գրիգորյանը, Արա Ադամյանն ու Արարատ Հարությունյանը:

Շուտով Ալեքսանյանի խաղը գրավեց «Շիրակի» մարզիչների ուշադրությունը և պատանի ֆուտբոլիստը հրավիրվեց Գյումրիի գլխավոր թիմ: «Շիրակում» առաջին հանդիպումը Կարեն Ալեքսանյանն անցկացրեց 1997թ. առաջնության 4-րդ տուրում՝ օգոստոսի 16-ին «Երևանի» հետ կայացած մրցավեճի 70-րդ րոպեին փոխարինելով Վարդան Բիչախչյանին: Այդ տարի ևս նա մասնակցեց առաջնության 9 խաղի:

Ահա «Շիրակի» կազմում 200 և ավելի խաղ անցկացրած ֆուտբոլիստների ցանկը:

armsport.am