Դժգոհություններ` «Փարքինգ սիթի սերվիսից»

Երևանում վճարովի ավտոկանգառների սպասարկմամբ զբաղվող «Փարքինգ սիթի սերվիսը» կարող է այնպես անել, որ անվճար ավտոկանգառում կայանած մեքենայի սեփականատերը ընդամենը մեկ վայրկյանում դառնա ընկերության պարտապանը:

Այս մասին այսօրվա համարում գրում է «Հայկական ժամանակ» օրաթերթն ու նշում, որ երեկ, թերթի թղթակիցը ականատես է եղել հետևյալ տեսարանի.

«Մաշտոցի պողոտայում անվճար կայանատեղիում կայանված են մի քանի ավտոմեքենաներ: Այդ պահին կանգառում է հայտնվել «Փարքինգ սիթի սերվիսի» աշխատակիցներից մեկը՝ ներկող սարքով, ու ներկել ավտոկանգառի սահմանները կարմիր ներկով: Մեքենաները վայրկյանների ընթացքում հայտնվել են կարմիր գծանշման, այսինքն՝ արդեն վճարովի կանգառի, սահմաններում: Ինչպես հայտնի է, եթե կարմիր գծանշման սահմաններում ես մեքենան կայանել, պետք է վճարես: Վարորդները շվարել են, թե ինչպես դարձան «Փարքինգ սիթի սերվիսի» պարտապանը:

Նրանցից մեկը մեր թերթի թղթակցի հետ զրույցում դժգոհել է, որ «էսպես չեն սպասարկում», որ դա նշանակում է անբարեխիղճ վերաբերմունք ընկերության ծառայություններից օգտվող քաղաքացու նկատմամբ:

Վարորդները չեն կողմնորոշվել՝ կայանելու համար վճարե՞ն, թե ոչ, քանի որ իրենք ի սկզբանէ անվճար կանգառում էին կայանել: Իսկ ներկարարը տեղափոխվել է այլ տարածք՝ անվճար կանգառները ներկազարդելու:

Ինչպես հայտնի է, «Փարքինգ սիթի սերվիսի» ծառայություններից վարորդները դժգոհ են: Նախ՝ մեկ տարվա վարձ վճարելով (12 հազար դրամ), վարորդը մեքենան մայրաքաղաքում տվյալ ժամկետի համար կայանելու իրավունք չունի: Անգամ եթե դեկտեմբերի 29-ին մեկ տարվա գումար վճարես, ծառայությունից օգտվելու իրավունք ունես մինչև ընթացիկ տարվա վերջին օրը: Դժգոհության երկրորդ պատճառն այն է, որ ընկերությունը գումար է գանձում, սակայն մեքենաների անվտանգության համար գրեթե քայլեր չի ձեռնարկել:

Մանրամասները՝ «Հայկական ժամանակ»-ի այսօրվա համարում: