ՄԱԿ-ի տեսուչները Սիրիայից կհեռանան շաբաթ օրը

Դամասկոսի ռազմակայանները տարհանվում են

ՄԱԿ-ի գլխավոր քարտուղար Բան Կի Մունը օգոստոսի 29-ին Վիեննայում հայտարարեց, որ Սիրիայում քիմիական զենքի օգտագործման հետքեր փնտրող միջազգային տեսուչների խումբը այդ երկրից կհեռանա շաբաթ առավոտյան:

Ֆրանսպրեսը հաղորդում է, որ օգոստոսի 29-ի առավոտյան ՄԱԿ-ի փորձագետները Դամասկոսում իրենց հյուրանոցից դուրս են եկել, որպեսզի 3-րդ օրն անընդմեջ մեկնեն օգոստոսի 21-ի ենթադրյալ քիմիական գրոհի վայրՙ Գուտայի շրջան, որը մայրաքաղաքի ծայրամասում է: Բան Կի Մունի խոսքերով, տեսուչները իրենց հետազոտությունը պետք է ավարտեն այսօրՙ օգոստոսի 30-ին:

Նախօրեին ԱՄՆ-ի նախագահ Բարաք Օբամայի հետ ունեցած հեռախոսազրույցի ժամանակ ՄԱԿ-ի գլխավոր քարտուղարը նրան խնդրել էր հնարավորություն տալ, որպեսզի քիմիական զենքի միջազգային փորձագետներն ավարտեն աշխատանքը Սիրիայում:

Իսպանական EFE գործակալությունը հաղորդում է, որ փորձագետների աշխատանքի նախնական արդյունքները կարող են հրապարակվել արդեն շաբաթ օրը:

Արդյունքների հրապարակմանը չսպասելովՙ Արեւմուտքն արդեն ռազմանավեր է ուղարկել Միջերկրական ծովի արեւելյան շրջաններ: Ակտիվանում է նաեւ Ռուսաստանը: Այդ երկրի զինվորական աղբյուրներ վկայակոչելովՙ Ինտերֆաքս գործակալությունը հաղորդում է, որ Մոսկվան «մոտ օրերս» տարածաշրջան կուղարկի հակասուզանավային ռազմանավ եւ հրթիռակիր նավ, որոնք «կմիանան այնտեղ գտնվող ռուսական նավախմբին»: ՌԴ պաշտպանության նախարարությունը այս կապակցությամբ որեւէ հայտարարություն չի արել:

«Ֆիգարո» թերթի կայքէջը հավելում է, որ ԱՄՆ-ը հայտարարել է տարածաշրջանում իր նավախումբը 4-րդՙ հրթիռակիր ռազմանավով համալրելու մտադրության մասին:

Սիրիայի իշխանությունները պատրաստ են մահապարտ օդաչուների օգտագործել ԱՄՆ-ի եւ նրա դաշնակիցների հնարավոր հարձակումը կասեցնելու համար: Դամասկոսի մոտ գտնվող հակաօդային պաշտպանության ռազմակայանի սպաներից մեկը ԻՏԱՌ-ՏԱՍՍ-ի թղթակցին ասել է, որ արդեն ստեղծված է 13 օդաչուներից կազմված «մահապարտների խումբ»:

«Եթե չկարողանանք դիմակայել թշնամու օդուժին, մեզ կօգնեն օդաչուները, որոնք պատրաստ են խոյահարելու հակառակորդի օդանավերը», ընդգծել է սպան:

Նա պնդում է, թե սիրիական բանակում կան ավելի քան 8 հազար մահապարտներ, որոնք «պատրաստ են ամեն պահի նահատակվելու, որպեսզի կանգնեցնեն նախահարձակներին»:

Սիրիայի կառավարությունը սկսել է տարհանել մարդկանց կառավարական շենքերից եւ ռազմավարական կետերից, որոնք կարող են հարձակման թիրախներ դառնալ: Սիրիական բանակի հրամանատարությունը Դամասկոսի ռազմակայաններից տարհանում է զինծառայողներին: Սիրիայի ընդդիմադիրները տեղեկացնում են մայրաքաղաքի միջազգային օդանավակայանում նկատվող աշխուժության մասին. մոտակայքում բանակի երեք ռազմակայան կա:

«Ալ Արաբիա» հեռուստաալիքը հաղորդում է Դամասկոսից հեռացող զրահատեխնիկայի եւ բեռնատարների մասին: Մայրաքաղաքում օգոստոսի 29-ին սովորականից ավելի լուռ էր. մարդկանցից շատերը չէին գնացել աշխատանքի:

Իրանի հեռուստատեսությունը հաղորդում է, որ երկրի գերագույն հոգեւոր առաջնորդ, այաթոլլահ Ալի Խամենեին կարգադրել է Սիրիայից հետ կանչել իրանցի զինծառայողներին: Ընդհանուր առմամբ կհեռանա 12 հազար զինծառայող: Պատճառն այն երկյուղներն են, որ հակասիրիական ռազմական գործողությունը կհանգեցնի Սիրիայի օդանավակայանների փակմանը:

Մանրամասները` «Ազգ»-ի այսօրվա համարում: