Այսօր ռեժիսոր, մուլտիպլիկատոր Ռոբերտ Սահակյանցի ծննդյան օրն է (տեսանյութ)

«Իմ ֆիլմերը ժամանակագրական տեսքով հավաքելով մի ամբողջական ժապավենի մեջ, դարձել են իմ կենսագրությունը, կյանքի ու մարդկանց նկատմամբ իմ ունեցած վերաբերմունքի պատմությունը: Եվ եթե ափսոսում եմ «վատնած» ուժերիս համար` քաղաքական եւ հրապարակախոսական ֆիլմերի վրա, կմեղադրեմ ոչ թե ինձ, այլ այն վիճակին, որը ստիպում է արձագանքել ամեն մի պրոբլեմային եւ կոնֆլիկտային իրականությանը»:

Ռոբերտ Սահակյանց

Հայ անիմացիոն ֆիլմերի ռեժիսոր, սցենարիստ, մուլտիպլիկատոր Ռոբերտ Սահակյանցը ծնվել է 1950 թ. օգոստոսի 30-ին, Բաքվում։ 1964-ին ընտանիքով տեղափոխվել են Երևան, որտեղ Սահակյանցը ավարտում է միջնակարգ դպրոցը և ընդունվում Խաչատուր Աբովյանի անվան մանկավարժական համալսարան: 1970-ին, սովորելուն զուգահեռ նա սկսում է աշխատել Հայֆիլմ կինոստուդիայում, որպես նկարիչ-անիմատոր։ 1972–ին աշխատում է արդեն որպես ռեժիսոր-անիմատոր։ Այդ նույն ժամանակ ցածր հաճախելիության պատճառով Սահակյանցին հեռացնում են համալսարանից: 1987-ին ստացել է ՀԽՍՀ արվեստի վաստակավոր գործիչ կոչումը։ 2007-ին արժանացել է Հայաստանի Հանրապետության ժողովրդական արտիստի կոչմանը:

Իր մոտ 100 ֆիլմերի մեծամասնության սցենարի հեղինակը և բեմադրող ռեժիսյորը ինքը Ռոբերտ Սահակյանցն էր։ Ռոբերտ Սահակյանցի ֆիլմերն արժանացել են միջազգային կինոփառատոնների մրցանակներին Ֆրանսիայում, Իտալիայում, Իսպանիայում, Գերմանիայում, Ճապոնիայում, ինչպես նաև Ուկրաինայում, Ռուսաստանում և Էստոնիայում:

Վախճանվել է 2009-ին Երևանում՝ երկարատև հիվանդությունից և սրտի վրա բարդ վիրահատությունից հետո: