Սիրուշոն՝ իր կյանքի նոր էջի, ոգեշնչման և «սրտի ձայնի» մասին (ֆոտո)

Սիրուշոն, ինչպես նշել էր, 40 օր տևած աշխատանքից, հանդիպումներից և հանգստից հետո այս ամիս վերադարձել է Հայաստան, երեկ մասնակցել է իր երկրպագուների կազմակերպած միջոցառմանը, ինչից հետո էլ պատասխանել է BRAVO.am-ի հարցերին:

-Վերջերս ես վերադարձել ճամփորդությունից, ի՞նչն է ոգեշնչել քեզ, ո՞րն է այսօր Սիրուշոյի աշխարհը:

-Աշխատանքս է ինձ մշտապես ոգեշնչում: Ավելի շատ տեսնում եք լուսանկարներ հանգստիցս, որովհետև չեմ ուզում ցույց տալ այն, ինչ կատարվում է աշխատանքային առումով. սիրում եմ, երբ այդ ամենն անակնկալ է լինում:):

-«ՊռեԳոմեշ»-ի թողարկմամբ, կարծես, քեզ բարդ դրության մեջ ես դրել:): Ի՞նչ է սպասվում հաջորդիվ:

-Գիտեք, հաջորդ երգը ներկայացնելուց հետո կուզեմ ունենալ այն հանգստությունը, որ ունեի “ՊռեԳոմեշ”-ից հետո: Որովհետև ասել եմ այն, ինչ ցանկացել եմ: Այս երգն ինձ համար իսկապես եղել է մի գաղափար ու խոսք, որը փոխանցել եմ: Սա նոր էջ էր իմ կյանքում և, իհարկե, կունենա իր շարունակությունը:

Լսում եմ սրտիս ու հոգուս. երաժշտությունը գալիս է հենց այնտեղից: Տեսնենք, թե ինչպիսին կլինի հաջորդ երգը… Ստեղծագործելու հետաքրքրությունը հենց դրանում է. չգիտես, թե ինչ կարող ես ակնկալել ինքդ քեզնից: Ես էլ չգիտեմ, թե ինչպիսի երաժշտություն կարող է ծնվել վաղը:

-Համենայնդեպս, նախորդի հաջողությունը կրկնելու կամ գերազանցելու հարցում մտավախություն չկա՞: Ի՞նչ ես անելու, որ ինքդ քեզ հասնես:):

- Ինչ-որ չափով նման մտավախություն կա:): Բայց պետք է ինքդ քո մեջ փակես այդ զգացողությունը, որովհետև հաջորդ աշխատանքը ստեղծելիս այն կարող է խանգարել: Անգամ մտքում չպետք է համեմատես երգերդ: Ուղղակի փորձելու եմ աշխատել ու ստեղծել այն, ինչ գալիս է:

Հարցազրույցն ամբողջությամբ՝ BRAVO.am-ում: