ՀՅԴ-ն պատրաստվում է ազդարարել կոալիցիա վերադառնալու փաստը

«Հրապարակ» օրաթերթն այսօրվա խմբագրականում գրում է.

«Երեկ ՀՅԴ Գերագույն մարմնից հաղորդագրություն ստացանք՝ սեպտեմբերի 2-9-ը ԼՂՀ անկախությանը նվիրված միջոցառումների կազմակերպման մասին. Եռաբլուրից քայլարշավ Ազատության հրապարակ, ապա հանրահավաք-համերգ հրապարակում:

Հաղորդագրությունը թերևս չգրավեր մեր ուշադրությունը և խմբագրականի թեմա չդառնար, եթե մի քանի կարկառուն ՀՅԴ-ականների՝ եվրոպական երկրներում դեսպաններ և հյուպատոսներ նշանակվելու մասին մամուլում վերջին օրերին շրջանառվող լուրերը չլինեին: Եթե այդ լուրերն իսկապես համապատասխանում են իրականությանը, ապա պետք է ենթադրել, որ ՀՅԴ-ն այդ փառահեղ իրադարձությունն է պատրաստվում նշել սեպտեմբերի 2-9-ը՝ այն էլ բարձր մակարդակով:

Թերևս հանրահավաքում պատրաստվում է ազդարարել իր՝ ըստ էության կոալիցիա վերադառնալու փաստը: Միայն թե այդ վերադարձն արվում է ծածուկ, ջայլամավարի՝ ԼՂՀ-ին նվիրված տոնախմբությունների ֆոնով քողարկելով: Եթե իրոք ՀՅԴ-ի դիվանագիտական «մարշ-բրասոկն» իրականություն դառնա, ապա կարելի է ավարտված համարել այս կուսակցության՝ ընդդիմություն կոչվելու համար մղած կարճատև պայքարը և արձանագրել, որ ՀՀ անկախության տարիներին Դաշնակցության ամենաճշգրիտ կերպարը 1994-97թվերին՝ Լևոն Տեր-Պետրոսյանի «օգնությամբ» կերտված կերպարն էր:

Անշուշտ, ոչ մի ողբերգական բան չկա նրանում, որ ՀՅԴ-ն որոշել է կրկին մտնել իշխանական կոալիցիա: Ողբերգությունն այն երեսպաշտությունն է, «կույս մնալու, միաժամանակ հաճույք ստանալու» ցանկությունը, որով անում են դա: Եթե ՀՅԴ կարկառունները՝ հանձինս Վահան Հովհաննիսյանի և մյուսների, լքում են ՀՅԴ «նավը» և տաքուկ անկյուններ փնտրում տեղավորվելու, ինչո՞ւ պետք է հասարակությունը հավատա, որ այդ կուսակցությունն ունակ է հոգալու իր հոգսերը և արդարացնելու իր հույսերը:

Մանրամասները` «Հրապարակ»-ի այսօրվա համարում: