«Թևանիկ». Նոր ֆիլմ՝ Արցախյան ազատամարտի մասին (լուսանկարներ)

Արցախյան գոյամարտ, և կրկին մարդկային ճակատագրեր, պատմություն, որ պետք է պատմվեր, փոխանցվեր սերունդներին և նվիրվեր աշխարհին:

«Թևանիկ». այսպես է կոչվում «Երկիր մեդիա» հեռուստաընկերության գլխավոր ռեժիսոր Ջիվան Ավետիսյանի նոր ֆիլմը, որի նկարահանման աշխատանքները վերջերս են ավարտվել:

«Թևանիկ»-ը Առնոլդ Աղաբաբովի կինոսցենարն է, և չնայած այն նախատեսված էր կարճամետրաժ ֆիլմի համար, ռեժիսորն ու կինոդրամատուրգ Կարինե Խոդիկյանը միասին, բացի Թևանիկից, ֆիլմում ավելացրել են ևս 2 պատանու պատմություն՝ Աստղիկի և Արամի պատմությունը։ Արդյունքում՝ ստացվում է 25-րոպեանոց 3 ֆիլմ՝ մի վերնագրի ներքո, 3 տարբեր ճակատագրեր, 3 պատանիների դրամա։

Lurer.com-ի թղթակցի հետ զրույցում ռեժիսորը, խոսելով դերասանական կազմի, նրանց մարմնավորած կերպարների մասին, պատմում է.

«Ֆիլմը 3 պատանիների կյանքի դրամայի մասին է՝ Արամի, Աստղիկի և Թևանիկի: Դեպքերը տեղի են ունենում նույն գյուղում և միաժամանակ: Պատմությունները սկսվում են գրեթե զուգահեռ և ավարտվում, երբ սկսվում է մեծ գրոհը գյուղի վրա:

Ֆիլմում ամեն մի դերասան մարմնավորում է մարդկային մի ճակատագիր: Օրինակ՝ Սաթենիկ Հախնազարյանը խաղում է Աստղիկի մոր կերպարը, ով մարմնավորում է պատերազմի ընթացքում ապրող կնոջ, ում ամուսինն ու որդին ռազմի դաշտում են:

Գրետա Մեջլումյանի կերպարը միայնակ կնոջ, աղոթող տատիկի մարմնացումն է: Նա Թևանիկի տատն է, ում մինուճար, որբ մեծացած զավակը պատերազմական գործողությունների ընթացքում դիպուկահարի զոհն է դառնալու:

Նարինե Պետրոսյանը ներկայացնում է հարյուրավոր այն երիտասարդ աղջիկներին, ովքեր թաց աչքերով դիմավորեցին իրենց սիրեցյալներին ռազմաճակատից:

Արթուր Մանուկյանն ու Մարինե Գաբրիելյանը ներկայացնում են մի ընտանիքի, ովքեր, թեպետ 15 տարի միասին սիրով ապրել են, բայց պատերազմի արդյունքում բաժանվելու են:

Չարիքը մտնում է այդ ընտանիքներն ու քայքայում դրանք: Չնայած նրան, որ պատերազմն արդեն օդում կախված է, նրանք, միևնույն է, պատկերացում չունեն դրա մասին, թերահավատությամբ են նայում պատերազմին, որովհետև ամբողջ մի կյանք ապրել են Սովետական ժամանակաշրջանում: Նրանք չեն էլ պատկերացնում, որ այն կդառնա մեծ պատերազմ:

Կարեն Ջահանգիրովը կերտում է տարեց ուսուցչի կերպար, ով, թեև թերթերում կարդում է Սովետական միության փլուզման մասին, բայց չի կարողանում հավատալ դրան:

Վահագն Գալստյանը, ով խաղում է վարսավիր Վասիլի կերպարը, շուտ կարողանալով հասկանալ սպասվող պատերազմի վտանգը` ընտանիքի հետ փախչում է գյուղից:

Արա Սարգսյանն ու Գրիգոր Գաբրիելյանը պատկանում են գյուղի այն սերունդին, ովքեր, թեպետ Զենիթը տանում են առաջին գիծ, բայց նրանց համար դա անմտություն է, որովհետև Սովետական կարգերը նման պատերազմ թույլ չեն տա:

Նարեկ Ներսիսյանը, Վարուժան Ավանեսյանը, ինչպես նաև` շատ այլ դերասաններ, կերտում են հասարակ գյուղացու խիզախ կերպար, ովքեր առավոտյան արթնացել են որպես պարզ շինական, իսկ կեսօրն անց նահատակվելու են որպես երանելի մարտիրոս:

Բաբկեն Չոբանյանը կերտել է հրամանատարի կերպարը, ով արտերկրից ժամանել է Արցախ, որպեսզի իր ռազմական փորձով կարողանա իրականացնել գյուղի պաշտպանությունը:

Սոս Ջանիբեկյանը մարմնավորում է ժամանակի նոր սերունդը, ով ամեն պարագայում համաձայն չէ գյուղը թողել թշնամուն: Ֆիլմի ավարտին` հրամանատարի մահից հետո, նա է իր վրա վերցնում հրամանատարի պարտականությունները, և նա է գյուղի փոքրիկ կայազորին առաջնորդում դեպի ինքնապաշտպանություն:

Կարճ ասած, տարբեր կերպարներ, տարբեր բնավորություններ, և բնականաբար, կերտված տարբեր ճակատագրեր»:

Վերջինիս խոսքով` ֆիլմի նկարահանման աշխատանքները նաև դժվարություններով են ընթացել, սակայն նպատակ է եղել սուղ միջոցներով հասնել ավելիին:

Ջիվան Ավետիսյանը կարևորում է Արցախյան գոյամարտի մասին ֆիլմերի նկարահանումները և այդ ընթացքում աղճատված կյանքերի մասին խոսելը, որպեսզի մեր երկրի սահմաններից դուրս ապրող մարդիկ այդ ֆիլմերի միջոցով գոնե հասկանան, թե ինչ է իրականոււմ իրենից ներկայացնում Արցախյան ազատամարտը:

Նշենք, որ ֆիլմի ստեղծմանն աջակցել է Հայաստանի Ազգային կինոկենտրոնը, ԼՂՀ կառավարությունը, ինչպես նաև` ռեժիսորի ընկերները, ովքեր կարևորում են Ջիվան Ավետիսյանի կինոարվեստն ու Արցախյան թեմայով ֆիլմերի արտադրությունը:

Նելլի Ավետիսյան

Առաջարկում ենք կարդալ նաև` Ղարաբաղի մասին պատմող ֆիլմերը՝ Կաննի կինոշուկայում: