Աշակերտական նստարանից է սկսվում վաղվա քաղաքացու և անհատի դաստիարակումը. Գագիկ Ծառուկյան

«Բարգավաճ Հայաստան» կուսակցության նախագահ Գագիկ Ծառուկյանը շնորհավորել է Գիտելիքի օրվա և ուսումնական տարվա մեկնարկի առիթով

«Սիրելի՛ աշակերտներ, ուսուցիչներ և ծնողներ, հարգելի՛ ուսանողներ և դասախոսներ, ի սրտե շնորհավորում եմ ձեզ՝ Գիտելիքի օրվա և ուսումնական տարվա մեկնարկի առիթով:

Հենց աշակերտական նստարանից է սկսվում վաղվա քաղաքացու և անհատի դաստիարակումը, հենց դպրոցում է սերմանվում սերը դեպի ուսումն ու ձգտումը դեպի գիտելիքի անսպառ շտեմարան: Մեր երեխաներն արժանի են լավագույնին և նրանք պետք է ստանան ժամանակի պահանջներին համահունչ գիտելիքներ, լինեն մրցունակ, քանի որ ապագան կրթված ու բանիմաց սերնդինն է: Այս գործում անասելի մեծ է մանկավարժների և դասախոսների դերակատարումը, ովքեր դպրոցականներին ու ուսանողներին են փոխանցում իրենց գիտելիքները:

Սիրելի՛ աշակերտներ և ուսանողներ, դուք պետք է լավ սովորեք, օգտագործեք գիտելիքներ ստանալու և ձեր կրթական շտեմարանը հարստացնելու բոլոր հնարավորությունները, քանի որ մեր երկրի բարգավաճման հիմնասյունը գրագետ մասնագետներն են:

Եվս մեկ անգամ շնորհավորելով Սեպտեմբերի մեկի կապակցությամբ՝ մաղթում եմ մեծ ձգտում և աշխատասիրություն: Թող իրականություն դառնան ձեր բոլոր նվիրական ցանկություններն ու երազանքները:

«Բարգավաճ Հայաստան» կուսակցության նախագահ

ԳԱԳԻԿ ԾԱՌՈՒԿՅԱՆ»: