Վահան Հովհաննիսյան. «Մեկ էլ տեսար` արտասահմանում սկսեցին ափեր-ցփեր խոսել մեր զիջումների մասին»

Արցախի անկախության 22-րդ տարեդարձի կապակցությամբ Երևանի Ազատության հրապարակում հանրահավաք էր հրավիրել Հայ Յեղափոխական Դաշնակցությունը: 

Հանրահավաքին ներկա էր ՀՅԴ բյուրոյի անդամ, ԱԺ ՀՅԴ խմբակցության պատգամավոր Վահան Հովհաննիսյանը, ով իր ելույթում ասաց.

«25 տարի առաջ այս հրապարակը և ամբողջ շրջակա տարածքները լեցուն էին ժողովրդով, և այդ ժողովուրդը կանգնել էր պայքարի ազատության և արդարության համար: Այն ժամանակ ոչ ոք մեզանից` թե՛ զոհվածները, թե՛ ողջերը, չգիտեին` ի'նչ է մեզ սպասվում: 88 թվականին, երբ շարժումը սկսվեց, ոչ ոք մեզանից չգիտեր, որ ընդամենը մեկ ամիս հետո ավերիչ երկրաշարժը տասնյակ հազարավոր զոհեր է տանելու հայ ժողովրդից` և հողին հավասարեցնելով ամբողջ հյուսիսային Հայաստանի արդյունաբերական պոտենցիալը: Մենք չէինք էլ պատկերացնի, որ երեք տարի հետո Արցախը հռչակելու է իր անկախությունը:

Սիրելի՛ ժողովուրդ, երբեք մի' մոռացեք, որ Արցախն ավելի շուտ է իր անկախությունը հռչակել, քան Հայաստանը: Հայաստանի անկախությունը արդյունք էր Սովետական միության փլուզման, Արցախինը՝ զինված ապստամության և ժողովրդի ազատատենչ մղումների»:

Վերջինս նաև հարց բարձրացրեց` ինչու ենք մենք դարձել այսքան խեղճ, ինչո՞ւ ենք մենք մոռացել սեփական իրավունքների համար պայքարելու մաքուր և ազնիվ արվեստը:

«Մեր պայքարը Արցախի ճանաչման համար է. մենք Արցախում զիջելու բան չունենք: Մենք շատ բան թույլ տվեցինք: Տարիներ շարունակ մենք լուռ էինք մնում ձեզ հետ: Չէ՞ որ «տեղից հելած» նորելուկ քաղաքական գործիչները, քաղաքական դեմքերը, պետական այրերը մեկ էլ տեսար` արտասահամանում սկսեցին «ափեր-ցփեր» խոսել մեր զիջումների մասին: Դո՞ւք եք վերցրել, որ զիջեք... վերցրել են հայ զինվորները, և հայ ժողովուրդն է միայն իրավասու որոշելու` որն է լինելու Հայոց զիջումը: Այսօր Ադրբեջանը հիստերիայի մեջ է: Նրանք խայտառակ հիստերիկ վիճակում են»: