Անարխիա, ամենաթողություն և անդեմ պայքար

Արդեն քանի օր է` մի խումբ ակտիվիստներ պայքարում են «Փակ շուկան» Երևան սիթի սուպերմարկետի վերածելու դեմ: Այս օրերի ընթացքում պայքարը հիմնականում տարվում է ընդդեմ «Փակ շուկայի» ներկայիս սեփականատեր, ԱԺ ՀՀԿ-ական պատգամավոր Սամվել Ալեքսանյանի դեմ:

Վերջին օրերին իրենց ելույթներում «ընդդեմ» Ալեքսանյանի են արտահայտվել նաև Երևանի նախկին ճարտարապետ Նարեկ Սարգսյանը, մշակույթի փոխնախարար Արև Սամուելյանը:

Մշակույթի փոխնախարարը հայտարարեց, որ նախարարությունը «Փակ շուկայում» շինարարություն չի թույլատրել, ինչպես նաև այն իրականացնելու որևէ նախագիծ չի հաստատել:

Իսկ Նարեկ Սարգսյանն էլ իր հերթին հայտարարեց, որ հուշարձանն աղճատված է, և բազմաթիվ ջանքերը` հուշարձանը պահպանելու, օգուտ չտվեցին:

Լուրեր.com-ը զրուցեց ԱԺ ՀԱԿ խմբակցության պատգամավոր Լյուդմիլա Սարգսյանի հետ`  ճշտելու` արդյոք ամբողջ պատմության մեղավորը Սամվել Ալեքսանյա՞նն է, և պայքարի թիրախը ճի՞շտ է ընտրված:

Սարգսյանի խոսքերով` Սամվել Ալեքսանյանը երկրում տիրող ամենաթողության վառ արտահայտված տեսակն է:

«Եթե իշխանությունը նրա ձեռքը բռներ, եթե կառավարության ղեկավարը նորմալ մարդ լիներ, ով կառաջնորդվեր քաղաքացիների, մեր երկրի, մեր պատմաշակութային հուշարձանների պահպանման հիմնական խնդրով, բնականաբար, ո՞վ է Սամվել Ալեքսանյանը, որ կարողանար ոտնահարեր և՛ Մշակույթի նախարարությունը, և՛ Ճարտարապետների միությունը, և՛ Քաղաքաշինության նախարարությունը, և՛ Նարեկ Սարգսյանին, ովքեր, որքան տեղյակ եմ, կարծիք են հայտնել, որ շինարարությունը տեղի է ունենում օրենքի խախտմամբ:

Բայց, ինչպես տեսնում եք, մեր երկրում ամենաթողությունը հասել է այն աստիճանի, որ նույնիսկ համապատասխան գերատեսչությունը հնարավորություն չունի կանխելու ապօրինությունները, որովհետև ամեն ինչ ուղորդվում է վերևից, իսկ վերևում, կարծես թե, չեն տիրապետում իրավիճակին. ամենաթողությունը թույլատրվում է քրեաօլիգարխիկ համակարգի ամենավառ ներկայացուցիչներին, որոնք և մինչև կոկորդը կախվածության մեջ են:

Այսօր երկրում տիրում է անարխիա, որից, բնականաբար, օգտվում են նախևառաջ Սամվել Ալեքսանյանի նման ներկայացուցիչներն ու իշխանությունը, որ վերարտադրված իշխանություն է գոնե պիտի փորձեր երկրում օրենքի գերակայություն հաստատել: Եթե օրենքն արգելքներ դներ նման մարդկանց առաջ, գոնե մի փոքր հույս կարող էինք ունենալ, որ օրենքը կսկսի աշխատել, իսկ Սամվել Ալեքսանյանն էլ հնարավորություն չէր ունենա ամբողջ երկրի կողմից ստեղծված պատմամշակութային հուշարձանների ոչնչացման և արդյունքում ամեն ինչ քիչ-քիչ տեղը կկարգավորվեր»,- ասաց Սարգսյանը:

Լուրեր.com-ը զրուցեց նաև ԱԺ «Բարգավաճ Հայաստան» խմբակցության քարտուղար Նաիրա Զոհրաբյանի հետ: Վերջինս նշեց, որ նոր է վերադարձել Հայաստան, իսկ ԲՀԿ-ից խնդրով զբաղվում է Էլինար Վարդանյանը` Մարդու իրավունքների հանձնաժողովի նախագահը:

Զոհրաբյանի խոսքերով` Վարդանյանն իր ուշադրության կենտրոնում է պահում խնդիրը:

Իսկ հարցին, թե Սամվել Ալեքսանյանը` որպես խնդրի հիմնական մեղավոր, ճի՞շտ է ընտրված, Զոհրաբյանն ասաց.

«Եթե իրապես որոշակի ճարտարապետական նորմեր խախտվել են, ապա Քաղաքապետարանը, Մշակույթի նախարարությունը, Ճարտարապետների միությունը տեղյակ չե՞ն եղել... ես խիստ կակածում եմ, որ տեղյակ չեն եղել: Կա Քաղաքապետարան, կա Ճարտարապետների միություն, կա Մշակույթի նախարարոթյուն, ուրեմն` իրենք էլ թող զբաղվեն այդ խնդրով: Մեկ բան կարող եմ ասել, Էլինար Վարդանյանը խնդրով զբաղվում է»:

Գայանե Համբարձումյան