ԿԳ նախարարությունը կարող է դասախոսներին ուղարկել ակցիաների՝ վարձավճարների թանկացման պահանջով

Հայաստանում քաղաքական, կամ, ինչպես սիրում են ներկայացնել, քաղաքացիական պայքարը հետաքրքիր երանգներ է ընդունում: Բոլորը սկսել են պայքարել իրար դեմ՝ ներխուժելով ներքնազգեստային վանկարկումների դաշտ: Որևէ փորձ՝ հունավորել շարժումները, համախմբել քաղաքացիական տաք հոսանքները՝ չի նշմարվում: Հերոսություն է դարձել՝ օլիգարխին դիմել մականունով և վաստակել իրենց բաժին դափնիները, սակայն որևէ քայլ՝ ամեն փողոցի անկյունում պայքարելու փոխարեն համախմբելու ուժերը, չի արվում:

Քաղաքական ուժերից նմանատիպ գործառույթներ իրականացնելու թեթևակի փորձ արեց ՀԱԿ-ը՝ Լևոն Զուրաբյանի հայտարարության տեսքով: ՀԱԿ-ը հայտարարեց, որ պատրաստվում է ներկայացնել օրինագիծ, որտեղ սոցիալական բոլոր շարժումները ընդգրկված կլինեն: Սա համախմբման լավ կամ վատ փորձ է, բայց ի սկզբանե դատապարտված է անհաջողության՝ կուսակցական գործիչների անհատական ամբիցիաների պատճառով: ԲՀԿ-ն չի սիրում «Ժառանգությանը», «Ժառանգությունը» չի սիրում ՀԱԿ-ին, ՀԱԿ-ը չի սիրում մեկ ուրիշին, Դաշնակցությունը գալ տարին Բեռլինին մեջ վիճակում է, իսկ ակտիվիստները չեն սիրում բոլորին միասին վերցրած և ամեն պահի շեշտում են, որ իրենց պայքարը քաղաքական չէ: Եթե որևէ երևույթի դեմ պայքարում ես և պնդում, որ պայքարը քաղաքական չէ, նշանակում է, որ քո թիրախը ոչ թե պատճառն է, այլ հետևանքը: Առանց պատճառի վերացման՝ հետևանքը մնում է նույնը՝ մի փոքր բարեփոխված, մի փոքր ներկված: Իհարկե, երկրի կուտակված հիմնախնդիրների ֆոնին տարբեր խմբեր՝ գրանտով, առանց գրանտի, թերև «գրանտոտ» և ազնիվ հայրենասիրությամբ, լայն ճակատ են ստանում պայքարի համար, սակայն արդյունքում այդ շարժումները կարող են հասնել փոքրիկ, աննշմար հաջողությունների, որոնք միգուցե սոցիալական որևէ խմբի համար հարցեր կլուծեն, սակայն ընդհանուր հասարակական լուծումներ չեն պարունակի:

Հիմա ձեր թիրախներն էլ են խասիաթ դարձրել՝ ձեր դեմ պայքարել ակցիաների միջոցով: Սամվել Ալեքսանյանը իր աշխատողներին է ուղարկում Փակ շուկայի համար պայքարողների դեմ, տրանսպորտի վարչության պետը սակագների դեմ պայքարողներին է ուղղել որդիական հրետանին, ԿԳ նախարարությունն էլ կարող է դասախոսներին ուղարկել ակցիաների՝ «լուծեցեք մեր հարցերը, շուտ թանկացրեք վարձերը» լոզունգով:

Թերևս, քաղաքական մարաթոնի մեկնարկի ժամանակն է:

Վարուժան Բաբաջանյան