Տվե՛ք մեզ հստակ պատասխաններ. ԲՀԿ-ն սպասում է բացատրությունների

ՌԴ Նախագահ Վլադիմիր Պուտինի հրավերով` սեպտեմբերի 3-ին ՀՀ գործող նախագահ Սերժ Սարգսյանն աշխատանքային այցով մեկնել էր Ռուսաստանի Դաշնություն:

Բանակցությունների ընթացքում պետությունների ղեկավարները համակողմանիորեն քննարկեցին երկկողմ դաշնակցային գործընկերության ներկա վիճակն ու հեռանկարները, արտաքին քաղաքական փոխգործակցության հարցերը:

Ավելի ուշ Սերժ Սարգսյանը հանդես եկավ հայտարարությամբ, որ Հայաստանը ներգրավվում է Եվրասիական տնտեսական միության ձևավորման գործընթացում:

«Մենք հանգամանալի քննարկում անցկացրեցինք նաև եվրասիական ինտեգրացիայի հարցերի վերաբերյալ, և ես հաստատեցի Հայաստանի ցանկությունը՝ միանալու Մաքսային միությանը և ներգրավվելու Եվրասիական տնտեսական միության ձևավորման գործընթացում»,- ասել է Սարգսյանը և հավելել, որ սա ռացիոնալ որոշում է և բխում է Հայաստանի ազգային շահերից:

Հայտարարությունից հետո բուռն քննարկում և քննադատություններ սկսվեցին Facebook սոցցանցում:

Լուրեր.com-ը զրուցեց ԱԺ ԲՀԿ խմբակցության քարտուղար Նաիրա Զոհրաբյանի հետ` ճշտելու տեսակետը որոշման վերաբերյալ: Վերջինս նշեց, որ ինքն էլ անձամբ ունի բազմաթիվ հարցեր, որոնք անպատասխան են:

«Ես ինքս միանում եմ Ձեզ և հարց բարձրացնում այն պատասխանատուներին, ովքեր զբաղվում են արտաքին քաղաքականությամբ, ովքեր բանակցում են ասոցացման պայմանագիր կնքելու համար, ովքեր բանակցել, բանակցում կամ բանակցելու են Եվրասիական միությանն անդամակցելու համար: Ես` և՛ որպես քաղաքացի, և՛ որպես պատգամավոր, և՛ որպես Եվրոպական ինտեգրման հանձնաժողովի նախագահ, միանում եմ Ձեզ և հարց եմ ուղղում մեր արտաքին գերատեսչության պատասխանատուներին` վերջապես, նոյեմբերի 29-ին Վիլնյուսում կնախաստորագրվի՞ ասոցացման համաձայնագիրը:

Վարչապետը «Կոմերսանտին» տված հարցազրույցում հստակ հայտարարել էր, որ Եվրասիական միություն Հայաստանի մուտքն անհնար է, և աշխարհում չկա նման նախադեպ, քանի որ մենք չունենք ընդհանուր սահմաններ:

Ընդամենը 12 օր առաջ Արտաքին գերատեսչության պատասխանատուներից մեկը, փոխարտգործնախարար Շավարշ Քոչարյանը հայտարարեց, որ Եվրասիական միությանն անդամագրվելուց մենք կկորցնենք մեր սուվերենությունը:

Հիմա ես հարց եմ ուղղում նրանց, ովքեր պատասխանատու են արտաքին քաղաքականության համար, տվե՛ք մեզ հարցերի հստակ պատասխաններ:

Երեկվանից ես` որպես Եվրոպական հանձնաժողովի ինտեգրման նախագահ, չեմ կարողանում որևէ մեկի հետ այդ հարցով կապվել և ստանալ մեկ շատ պարզ, տրամաբանական հարցի պատասխան` նոյեմբերի 29-ին Վիլնյուսում ասոցացման համաձայնագիր նախաստորագվելո՞ւ է, թե՞ ոչ:

Պատասխանը չկա, որովհետև իրենք էլ չգիտեն: Հասկանալի է, որ կարելի է արդեն փակված համարել ազատ և համապարփակ առևտրի մասին խոսակցությունը, բայց ասոցացման համաձայնագիր ստորագրվելո՞ւ է, թե՞ ոչ:

Երբ որ բանակցողները կտան խորհրդարանին, քաղաքական ուժերին հստակ պարզաբանումներ և պատասխաններ, թե ինչ է ստանում Հայաստանը, ինչ ենք շահում Եվրասիական միությանն ինտեգրվելով, ստորագրվելու է ասոցացման պայմանագիր, թե` ոչ, ընդհանրապես ասոցացման պայմանագիրն ինչ է իր մեջ ներառում, այսինքն` պատասխաններ, որոնք գոնե քաղաքական ուժերը պարտավոր են իմանալ, նոր ճիշտ կլինի ակնկալել քաղաքական ուժերի արձագանքը:

Ես հարց եմ բարձրացնելու խորհրդարանում, որպեսզի թե՛ Եվրասիական միությանն անդամակցելու, թե՛ ԵՄ ասոցացման պայմանագրի հարցով արտաքին գերատեսչության պատասխանատուները գան խորհրդարան և քաղաքական ուժերին տան հստակ տեղեկատվություն:

Այս պահին չունենալով հստակ տեղեկատվություն` ինչու, ինչի համար, ինչ ենք շահում, ինչ ենք կորցնում, ես ձեռնպահ կմնամ որևէ մեկնաբանությունից»,- ասաց Զոհրաբյանը:

Գայանե Համբարձումյան