Ադրբեջան. Սենսացիաների պակաս չկա

Virtualaz.org-ը, որի խմբագիր-տնօրենը նախկին քաղբանտարկյալ Էյնուլլա Ֆաթուլլաեւն է, ում ադրբեջանցի եւ միջազգային իրավապաշտպանները լրջորեն կասկածում են «հատուկ ծառայությունների հովանու ներքո աշխատելու» մեջ, հղում անելով իսրայելական հետախուզությանը «մոտ կանգնած» Debka հրեական գործակալությանը, տեղեկացնում է, որ երեկ «Իսրայելի եւ Ադրբեջանի միջեւ ստորագրվել է Իրանի դեմ երկու երկրների հետախուզական ծառայությունների համատեղ գործունեության մասին եւս մեկ գաղտնի համաձայնագիր»:

Գործարքի մասին հայտնի է դարձել իրանական կողմին, որի տեղեկացվածությամբՙ «այդ երկու երկրները որոշել են Թել-Ավիվում եւ Բաքվում բացել առեւտրական ներկայացուցչություններ, բայց դրանք իրականում կծառայեն որպես հետախուզական կենտրոններ»: Բացի դրանից, ինչպես պնդում է Իրանը, վերջերս «Իսրայելը եւ Ադրբեջանը գյուղատնտեսության բնագավառում համագործակցության համաձայնագիր են կնքել, սակայն հայտնի է, որ խոսքը վերաբերում է Իրանի դեմ լրտեսություն իրականացնելու նատակով Իսրայելի կողմից Ադրբեջանում տարածքների վարձակալմանը»:

Իրավիճակը մեկնաբանելու խնդրանքով, ինչպես virtualaz.org-ն է գրում, իսրայելական լրատվամիջոցները դիմել են ԱՄՆ ԿՀՎ մի նախկին գործակալի, ով «Իրանի վերաբերյալ առ այսօր խորհրդատվություն է ցուցաբերում ամերիկյան պաշտոնյաներին»: Վերջինս ասել է, թե «չի մեկնաբանի Իսրայել- Ադրբեջան հարաբերությունների առանձնահատկությունները, բայց, այդուհանդերձ, հաստատել է երկու երկրների հատուկ ծառայությունների սերտ համագործակցությունը»:

«Միակ բանը, որ կարող եմ ասել, այն է, որ Իսրայելի եւ Ադրբեջանի կապը չափազանց խորն է, այնքան, որ իրանցիները երկյուղ ունեն, թե իսրայելական օդուժը կամ հատուկ նշանակության ջոկատները կարող են բազավորվել Ադրբեջանի տարածքում»,- եզրափակել է ԿՀՎ նախկին գործակալը: Պատահակա՞ն է, որ տեղեկատվական «արտահոսք» կազմակերպվել է Սիրիայի իրավիճակի բարդացման համապատկերին, իրավիճակ, որն Իրանի համար չափազանց կարեւոր է:

Մանրամասները` «Ազգ»-ի այսօրվա համարում: