«Արվեստը ինքնադրսևորվելու հնարավորություն է». Կամսար (ֆոտո)

«Արվեստը կյանքն իր բոլոր ծալքերով ու երանգներով ճանաչելու, հասարակության մեջ ինքնադրսևորվելու, բնության երևույթներն ըմբռնելու և այդ ամենը ստեղծագործաբար մեկնաբանելու հնարավորություն է: Եվ վերջապես այն ինձ համար ինքնաճանաչման հասնելու կատարյալ միջոց է»` ասում է աբստրակցիոնիստ արվեստագետ Կամսարը:

Գեղանկարիչը առաջին անգամ երևանյան հասարակությանը կներկայանա իր անհատական ցուցահանդեսով, որը տեղի կունենա Երևան քաղաքի պատմության թանգարանում սեպտեմբերի 13-23-ը: Ցուցահանդեսին կներկայացվեն շուրջ 50 նկարներ, որոնց մեծ մասը արվեստագետը հենց այս տարի է ստեղծել:

Կամսարը` նույն ինքը Կամո Սահակյանը, ծնվել է 1961 թ. ապրիլի 16-ին Եղեգնաձորում: Արվեստում առաջին քայլերը սկսել է հայրենի քաղաքի գեղարվեստի դպրոցից` 1971-1976 թթ, որտեղ նա սովորել է Վան Եղյանի դասարանում: Հետո ուսումը շարունակել է Փանոս Թերլեմեզյանի անվան գեղարվեստի ուսումնարանում` 1976 -1980 թթ: Մինչ օրս ապրում և ստեղծագործում է Եղեգնաձորում` իր ակտիվ մասնակցությունը բերելով իր քաղաքի մշակութային կյանքի ստեղծմանն ու զարգացմանը: Որպես արվեստագետ բազմաթիվ խմբային ցուցահանդեսների է մասնակցել, շուրջ մեկուկես տասնյակ տարի տնօրինում է Եղեգնաձորի Երկրագիտական թանգարանը, ինչպես նաև դասավանդում է տեղի Արվեստի դպրոցում:

Արվեստասերներին տեղեկացնենք, որ ցուցահանդեսի բացումը տեղի կունենա սեպտեմբերի 13-ին, ժամը 15:00-ին Երևան քաղաքի պատմության թանգարանում:

«Կոմպոզիցիա» 1996

«Կեսօր» 2000 թ.

«Ռեքվիեմ» 1915 թ. նահատակների հիշատակին, 1988 թ.