Ողբերգական ավտովթար՝ Գեղարքունիքի մարզում. 2 ժամկետային զինծառայող է մահացել, կա 2 վիրավոր

Այսօր՝ սեպտեմբերի 8-ին, ողբերգական ավտովթար է տեղի ունեցել Գեղարքունիքի մարզում: ժամը 06:00-ի սահմաններում Opel Vectra մակնիշի 32 ՕՏ 479 համարանիշի ավտոմեքենայի վարորդը Սևան-Մարտունի-Գետափ ավտոճանապարհի 17-րդ կմ հատվածում՝ Լճափ գյուղի խաչմերուկում, դուրս է եկել ճանապարհի երթևեկելի գոտուց և գլխիվայր շրջվելով հայտնվել դաշտամիջում գտնվող ժայռաբեկորների վրա:

Ինչպես հայտնում է shamshyan.com-ը, վթարի հետևանքով տեղում 2 հոգի մահացել են, իսկ 51-ամյա Զավեն Հակոբյանը և 25-ամյա Արամ Հակոբյանը մարմնական վնասվածքներով տեղափոխվել են Գավառի բժշկական կենտրոն:

Վիրավորներին բժշկական կենտրոն են տեղափոխել ոստիկանության Գավառի բաժնի աշխատակիցները և ճանապարհային ոստիկանության 2-րդ սպայական գումարտակի 4-րդ վաշտի աշխատակիցները, որոնց աշխատանքները տեղում ղեկավարում էին Գավառի ոստիկանապետ Կարեն Նիկոլյանը և վաշտի հրամանատար Սերգեյ Հակոբյանը:

Ավտոմեքենայի՝ գլխիվայր շրջվելու հետևանքով մահացածները դուրս էին նետվել ավտոմեքենայից:

Վթարի վայր են ժամանել նաև ՀՀ ՊՆ ռազմական ոստիկանության աշխատակիցները, քանի որ, ըստ նախնական տեղեկությունների, մահացածներ Գևորգ Հովհաննիսյանն ու Ռուբեն Բաղյանը ժամկետային զինծառայողներ են եղել:

Մանրամասները` այստեղ: