Թոմաս Բախը` ՄՕԿ-ի նախագահ

Բուենոս Այրեսում անցկացված ՄՕԿ–ի 125–րդ նստաշրջանի աշխատանքային վերջին օրը` սեպտեմբերի 10–ին, տեղի ունեցավ ՄՕԿ–ի նախագահի ընտրությունը: Իր լիազորությունները վայր դրեց այժմ արդեն նախկին նախագահ, բելգիացի Ժակ Ռոգեն, ով, ի դեպ, ընտրվեց ՄՕԿ–ի պատվավոր անդամ. տեղեկացնում է ՀԱՕԿ-ի պաշտոնական կայքը:

Ինչպես հայտնի է, թեկնածուները վեցն էին` Սեր Միանգ /Սինգապուր/, Չինգ Կուո Վու / Թայվան /, Ռիչարդ Կերրիոն /Պուերտո Ռիկո/, Դենիս Օսվալդ / Շվեյցարիա /, Սերգեյ Բուբկա / Ուկրաինա / և Թոմաս Բախ / Գերմանիա /:

Առաջին քվեարակությունից հետո պայքարից դուրս մնաց Չինգ Կուո Վուն:

Երկրորդ փուլում ձայների մեծ առավելությամբ / 49 / հաղթեց և ՄՕԿ–ի 9–րդ նախագահ ընտրվեց Թոմաս Բախը: Նրան հաջորդեցին Ռիչարդ Կերրիոն / 29 /, Սեր Միանգը / 6 /, Դենիս Օսվալդը / 5 / և Սերգեյ Բուբկան /4/:

Թ. Բախին վաղուց էին Ժակ Ռոգեին փոխարինող համարում: Գերմանացի 59 –ամյա Բախը ՄՕԿ –ի փոխնախագահ էր` Գերմանիայի օլիմպիական մարզական միության ղեկավարը, որն ունի մարզական փառավոր անցյալ, ղեկավարին անհրաժեշտ հարուստ փորձ` մարզաշխարհում և բիզնեսի ոլորտում:

Ընտրությունների ավարտից անմիջապես հետո լրագրողների հետ ունեցած ճեպազրույցում Բախն ասել է, որ թեև շատ է ուզում տիրապետել զգացմունքներին, բայց սաստիկ հուզված է: Սպորտում նա րոպեների ընթացքում է տեղեկանում մրցավարների տված գնահատականին: «Այս ընտրությունում հարկադրված էի արդյունքին սպասել ավելի քան մեկ ժամ»,- ասել է մարզիկը:

ՄՕԿ–ի 126–րդ նստաշրջանը տեղի կունենա 2014 թ. փետրվարի 5–7–ը` Սոչիում, որտեղ փետրվարի 7–ին կկատարվի ձմեռային օլիմպիական խաղերի բացման հանդիսավոր արարողությունը: