Դավոյանի և Բալայանի տարիքը չի համապատասխանում ՀԳՄ նախագահի պաշտոնի համար. Հրաչյա Սարուխան

Լուրեր.com-ը տեղեկատվություն է ստացել այն մասին, որ գրողների տարբեր խմբեր սկսել են պայքարը՝ Հայաստանի գրողների միության նախագահի պաշտոնին այս կամ այն անձի ընտրությունն ապահովելու համար: Արդեն շրջանառվում են միության նախագահի անուններ՝ Էդվարդ Միլիտոնյան, Զորի Բալայան, Ռազմիկ Դավոյան, Հրաչյա Սարուխան և այլն: Զրուցեցինք բանաստեղծ, թարգմանիչ Հրաչյա Սարուխանի հետ, ով ծնունդով Համզաչիման (այժմ` Մարգահովիտ) գյուղից է, այժմ բնակվում է Վանաձորում:

- Համացանցում ակտիվորեն շրջանառվում են տեղեկություններ այն մասին, որ դուք պատրաստվում եք Ձեր թեկնածությունն առաջադրել Գրողների միության նախագահի պաշտոնում. անգամ երիտասարդ գրողների մի խումբ հաղորդագրություն է տարածել, որում Դուք ներկայացվում եք որպես ամենաանցողիկ թեկնածուներից մեկը: Դուք տեղյա՞կ եք այդ խոսակցություններին:

- Այո, կողքից տեղյակ եմ, ինքս համացանցից չեմ օգտվում, մի քանի օր առաջ հպանցիկ տեղեկացա այդ մասին:

- Այսինքն` Դուք նախաձեռնության մասին տեղեկացված չե՞ք եղել:

- Ո´չ:

- Ի՞նչ եք կարծում, դա հենց երիտասարդ գրողների՞ ցանկությունն է՝ Ձեզ տեսնել միության նախագահի պաշտոնում:

- Ճիշտն ասած, ես չեմ կարող ասել, որովհետև այդ թեմայով հասկանալի պատճառներով դեռ շփումներ չենք ունեցել, հետո կերևա:

- Իսկ անձամբ Ձեր մոտ առաջադրվելու մտադրություն կա՞:

- Ճիշտն ասած, այդ ուղղությամբ հատուկ չեմ մտածել, նախկինում մեկ անգամ առաջադրվել եմ և ինքնաբացարկ եմ ներկայացրել, հիմա չեմ կարող ո´չ դրական, ո´չ բացասական պատասխան տալ:

-Որպես գրողների ընտանիքի անդամ և որպես հավանական թեկնածու՝ ո՞ւմ եք տեսնում Ձեր հնարավոր մրցակիցների թվում:

- Իմ կարծիքով՝ Էդուարդ Միլիտոնյանը կառաջադրվի, մյուսների պահով կդժվարանամ որևէ բան ասել, բայց բանաստեղծ Միլիտոնյանի առաջադրումը հնարավոր եմ համարում:

- Խոսակցություններ կան նաև Զորի Բալայանի և Ռազմիկ Դավոյանի՝ հնարավոր առաջադրման հետ կապված: Դուք այդ մասին տեղեկատվություն ունե՞ք:

- Տեղյակ չեմ, մի անգամ Ռազմիկը փորձեց, բայց չեմ կարծում, որ նրանց տարիքը համապատասխանում է հիմա, նույնիսկ ես մտածում եմ, որ իմ տարիքն էլ այնքան հաջող չէ:

- Արձակագիր Սամվել Բեգլարյանը, մեզ հետ զրույցում բարձր գնահատելով Ձեր մարդկային և ստեղծագործական որակները, կարծիք է հայտնել, որ դուք մեղմ ու փափուկ բնավորություն ունեք և ՀԳՄ նախագահ ընտրվելու դեպքում կարող եք կրկնել Հրանտ Մաթևոսյանի օրինակը, որը, լինելով հրաշալի անձնավորություն և տաղանդավոր գրող, չկարողացավ ղեկավարել միությունը:

- Սամվել Բեգլարյանին շատ լավ ճանաչում եմ, իմ վաղեմի ընկերներից է: Իհարկե, ամեն մարդ իր կարծիքն ունի: Եթե որոշեմ առաջադրվել և ընտրվեմ՝ այն ժամանակ կերևա: Ոչ մեկը հարյուր տոկոսանոց կարծիք չունի: Ես ինքս ինձ դեռևս ամբողջությամբ չեմ ճանաչում, կողքից դժվար թե ճանաչեն:

Վարուժան Բաբաջանյան