Որևէ բան կարո՞ղ է խոչընդոտել համազգային թալանի իրականացմանը

«Սիրուն չի-2» անվանումը ստացած տրանսպորտային օպերացիան հասավ իր տրամաբանական ավարտին, և բեմադրության շինծու լինելն այլևս ապացուցելու կարիք չկա: Սա այն դեպքում, եթե հավատանք Hayeli.am կայքի հրապարակմանը, համաձայն որի՝ Սերժ Սարգսյանը սեպտեմբերի 11-ին Բաղրամյան 26-ում փակ հանդիպում է ունեցել մի քանի լրատվամիջոցների ներկայացուցիչների հետ, որի ժամանակ երթուղայինների թանկացման վերաբերյալ ասել է, որ այդ թանկացումն անխուսափելի է, տրանսպորտի գինը պետք է անպայման բարձրանա: Ընդ որում, ըստ կայքի՝ սա ասվել է շատ կտրուկ ձևով, ինչը կարող է ունենալ հետևյալ բացատրությունը՝ մի՞չե կա այլընտրանք, մի՞թե որևէ բան կարող է խոչընդոտել համազգային թալանի իրականացմանը:

Այսինքն` եթե լուրը համապատասխանում է իրականությանը, ապա թանկացումն ի սկզբանե պլանավորված է եղել և, բնականաբար, ոչ առանց Սերժ Սարգսյանի համաձայնության: Ժամանակավոր կասեցումը նույնպես ներկայացման գործողություններից մեկն էր, որով մարդկանց պետք է շնորհվեր թվացյալ հաղթանակի զգացողություն, ինչն էլ հենց եղավ:

Այնպես որ, Սերժ Սարգսյանն իր շախմատային քաղաքականությամբ փայլուն հաղթանակներ է տանում սեփական ժողովրդի նկատմամբ: Իսկ Մաքսային միություն մտնելուց հետո հաղթանակներն ավելի կհեշտանան, քանի որ քրեապաշտության, թալանի, ատկատների, ֆեոդալական-տոհմատիրական կարգերի մշակույթը, որի ջատագովն է Ռուսաստանը, էլ ավելի կամրապնդի իր տեղը Հայաստանում:

Կարեն Վարդանյան