Ո՞վ է վարչապետի խորհրդավոր «սիրելին», որ զբաղեցրել է Իշխան Զաքարյանի տեղը

«Ժողովուրդ» թերթն իր այսօրվա համարում, փոխանցելով իր աղբյուրներից ստացված տեղեկատվությունը, գրում է, որ վրդովվելով Վերահսկիչ պալատի նախագահ Իշխան Զաքարյանի՝ կառավարության նիստին չներկայանալու փաստից՝ վարչապետ Տիգրան Սարգսյանը նրա տեղը «նվիրել է» իր «սիրելիներից» մեկին: Փաստորեն, այժմ կառավարության նիստերի դահլիճի այն տեղում, որտեղ ավանդաբար նստում էր Վերահսկիչ պալատի նախագահը, նստում է բոլորովին այլ մարդ:

Այնպիսի տպավորություն է, որ կառավարության նիստերը վարվում են տուն-տունիկի պարզ սկզբմունքով՝ ինչ-որ քմահաճույքի պատճառով պետության ղեկավար կազմի կարևոր պաշտոնյաներից մեկի տեղը կառավարության նիստերի դահլիճում կարող է զբաղեցնել մեկ այլ անձ, որովհետև պաշտոնյան նիստի չի ներկայացել և վարչապետը այդ փաստից խռովել է: Անհասկանալի է պարզապես, որ կառավարության ղեկավարը տեղյակ չէ այն մասին, որ Վերահսկիչ պալատի նախագահը հանրապետությունում չէ, ընդ որում, ոչ թե անձնական նպատակով, այլ ԱՊՀ երկրների բարձրագույն վերահսկիչ մարմինների ղեկավարների համագումարին մասնակցելու նպատակով: Նույն պետության գործուղմամբ նա շարունակելու է իր հանդիպումները Աբու Դաբիում, սակայն այդ մասին կառավարությունում տեղյակ չեն և խռովում են նիստերին չմասնակցելու փաստից:

Այս պատմության մեջ անհասկանալի մնաց, թե ով էր վարչապետի «սիրելին», և ում է բախտ վիճակվել զբաղեցնելու Իշխան Զաքարյանի տեղը...