Հունական պաշտպանություն ցեղասպանության նոր բանաձև

«Հայ-հունական հետզհետե ընդլայնվող համագործակցության վառ դրսեւորումներից կարելի է համարել, որ Կոնգրեսում հելլենիստական խմբավորման համանախագահներ Մայքլ Բիլիրակիսը (հանրապետականՙ Ֆլորիդայից) եւ Կարոլին Մալոնին (դեմոկրատՙ Նյու Յորքից) պաշտպանում են «Հայոց ցեղասպանություն: Ճշմարտություն եւ արդարություն» բանաձեւի (H. Res. 227) ընդունումը Կոնգրեսում», հաղորդում է Ամերիկայի Հայ ազգային (Հայ դատի) կոմիտեն:

«Մենք միանում ենք երկրում ապրող ամերիկահայերի եւ ամերիկահույների համագործակցությունը պաշտպանող կողմերինՙ շնորհակալություն հայտնելու կոնգրեսականներ Բիլիրակիսին եւ Մալոնիին, որ նրանք պաշտպանում են այդ բանաձեւը, որը դատապարտելով թուրքերի գործադրած ցեղասպանությունն ընդդեմ հայերի, հույների, ասորիների եւ քրիստոնյա այլ ազգությունների, միեւնույն ժամանակ ճանաչում եւ արդարություն է պահանջում», նշել է այդ առթիվ Հայ դատի գործադիր տնօրեն Արամ Համբարյանը, ավելացնելով. «Ամերիկյան իդեալների պահպանմանը նախանձախնդիր ամերիկացիների հետ հայերն ու հույները անհամբեր սպասում են այն օրվան, երբ Սպիտակ տունը ի վերջո վերջ կտա Անկարայի ժխտողական քաղաքականությունը մեղսակից լինելուն եւ կսկսի Թուրքիային եւ թուրքական հասարակության առաջ մղելՙ ընդունելու պատմական ճշմարտությունը եւ կատարված ոճրագործությունների պատասխանատվությունը»:

Հիշեցնենք, որ «Ճշմարտություն եւ արդարություն» նոր բանաձեւը առաջ էին քաշել այս տարվա մայիսին կոնգրեսականներ Դեյվիդ Վալադսոն, Ադամ Շիֆը, Մայքլ Գրիմը եւ Ֆրենկ Փալոնը: Հիմնվելով նախկինում արված գրավոր հաղորդագրությունների վրա (մայիսի 28, 1951 թ., ապրիլի 22, 1981 եւ այլն), բանաձեւը կոչ է անում Մ. Նահանգների նախագահինՙ գործելու հօգուտ կայուն եւ տեւական հայ-թուրքական հարաբերությունների հաստատմանը հիմնված ցեղասպանության փաստերի եւ հետեւանքների ամբողջական ճանաչման եւ արդարացի լուծման վրա:

Մանրամասները` «Ազգ»-ի այսօրվա համարում: