Իշխանափոխություն՝ փողով

Եթե երկրի իշխանությունները վատն են, բնակչության ցանկությունը պետք է լինի նրանց փոխելը: Իսկ քանի որ մեր երկրում իշխանությունները շատ վատն են, իշխանափոխությունն արդեն բաղձալի երազանք է դարձել: Պարզապես տարբեր են ուղիները, որոնցով երազում են ցանկացողները:

Ընդ որում, ոչ բոլորն են երազում, ժամանակ առ ժամանակ գործի էլ են անցնում, մեկը՝ սահմանադրական ճանապարհով, մյուսը՝ հեղափոխության, մեկ ուրիշը՝ ակցիաների, սակայն արդյունքում` բոլոր փորձերն էլ միշտ տապալվում են: Այստեղ էլ միշտ մարդիկ փորձում են պատճառներ գտնել՝ ասելով, թե մեկը ծախված էր և իրականում շոու էր սարքել, մյուսն էլ շատ թույլ էր, ռեսուրսներ չուներ:

Հիմա էլ սկսվել է մի նոր նախաձեռնություն, որն իշխանափոխության նոր տարբերակ է առաջարկում` Համազգային ճակատ, որն իր մեջ ընդգրկում է եվրոպական երկրների հայկական համայնքների ներկայացուցիչներ, հայկական կազմակերպություններ՝ ֆինանսական ռեսուրսներ ունեցող, նաև արդեն ներկայացուցիչներ Հայաստանից, և գնալով պետք է ընդլայնվի, հզորանա ու վերջը ստիպի իշխանություններին հեռանալ: Կարծես թե, առաջին հայացքից շաբլոն սցենար է, և բոլորն էլ նույնն են փորձում անել, և արդյունքում՝ ձախողում: Սակայն կա մի տարբերություն՝ այստեղ փող կա, միջոցներ կան. համենայն դեպս, դա հավաստում են մասնակիցները, ովքեր Սլովակիա էին մեկնել Եվրոպայի հայկական միությունների ֆորումի 15-րդ հոբելյանական համագումարին մասնակցելու համար: Հենց այնտեղ էլ քննարկվել է Համազգաին ճակատ ստեղծելու և Հայաստանում իշխանափոխություն իրականացնելու հարցը։ Ի դեպ, այստեղ հետաքրքիր անուններ կան, առաջին հայացքից` միմյանց հետ կապ չունեցող. ՀՌԱԿ նախկին ատենապետ Հարություն Առաքելյան, նախկին արդարադատության նախարար Գևորգ Դանիելյան, նախագահի նախկին թեկնածու Արամ Հարությունյան, բարերար Լևոն Հայրապետյան և այլն:

Չնայած յուրաքանչյուր նախաձեռնության մեջ էլ հետաքրքիր անուններ լինում են, սակայն այս դեպքում ուշագրավ է ֆինանսի առկայությունը: Ժողովրդի՝ «փողը մութ տեղն էլ է լույս տալիս» արտահայտությունն, անշուշտ, իր մեջ ճշմարտություն ունի, և անկախ նրանից, թե ինչ ընթացք և ելք կունենա այս նախաձեռնությունը, այն իրենով արդեն մի նոր, և միգուցե ճշմարիտ ուղղություն է ցույց տալիս։ Ցանկացած գործունեություն, որպեսզի շարունակական և արդյունավետ լինի, պետք է ունենա նյութական հիմք, միջոցներ, կարճ ասած՝ փող, այլապես կդատապարտվի ձախողման: Նույնիսկ քաղաքական կուսակցությունները, որոնք ունեն սուղ ֆինանսական միջոցներ, ի վերջո, սպառվում են, «մեռնում»: Աչքներիս առջև բազմաթիվ օրինակներ ունենք:

Ուստի` փողը, եթե նույնիսկ երջանկություն չի բերում, ապա իշխանափոխության հարցում մեծ նշանակություն ունի:

Կարեն Վարդանյան