17 մեդալ` Հայաստանին Եվրոպայի պատանեկան առաջնությունից

Օրերս լիտվական Կլայպեդա քաղաքում կայացած ծանրամարտի 15 ու 17 տարեկանների Եվրոպայի պատանեկան առաջնությունում մեր մարզիկները գերազանցել են բոլոր սպասելիքները:

Երևանցի Սարգիս Կիրակոսյանը (85 կգ քաշային կարգում) անկրկնելի ելույթներ է ունեցել` արժանանալով աշխարհի չեմպիոնի տիտղոսին: Նույն քաշում արծաթե մեդալ է նվաճել Արսեն Մարտիրոսյանը: Վերջինիս ավագ եղբայրը` տասնյոթամյա գերծանր քաշային Սիմոն Մարտիրոսյանը, հավատարիմ մնալով որդեգրած սկզբունքին, շարունակել է զարմացնել ողջ մարզաշխարհին երկամարտի 367 կգ արդյունքով հաղթել է բոլորին:

Սիմոնին լավ են հիշում անգամ մարզական աշխարհից հեռու մարդիկ, ամիսներ առաջ` աշխարհի առաջնությունում նա նվաճեց հողագնդի ամենաուժեղի տիտղոսը:

Տասնյոթ տարեկաններից արծաթե մեդալ են նվաճել մեր տղաներից վանաձորցի Էդմոն Բադալյանն ու գյումրեցի Ժորժ Եղիկյանը` համապատասխանաբար 62 և 69 կգ քաշային կարգերում, իսկ 50 կգ քաշային կարգում պոկում վարժությունում բրոնզե մեդալակիր է դարձել էջմիածինցի Հրայր Հովհաննիսյանը: Բրոնզե մեդալներ են նվաճել նաև գյումրեցի Հենրիկ Խաչատրյանն (62 կգ քաշային կարգ) ու քասախցի Մանուկ Մկրտչյանը ( 77 կգ քաշային կարգ). տեղեկացնում է msy.am-ը:

Այսպիսով, թիմային ընդհանուր հաշվարկով Հայաստանի տասնյոթ տարեկանների ընտրանին անգերազանցելի է եղել և 2 տարիքային խմբի մարզիկները մեծ «հունձքով» են տուն վերադարձել` 17 մեդալով, իսկ աղջիկներն էլ իրենց հերթին նվաճել են 5 մեդալ:

Մեր հավաքականը գլխավորում էր ՀՀ վաստակավոր մարզիչ, հավաքականի գլխավոր մարզիչ Էդիկ Կիզօղլյանը: Անշուշտ, սա հրաշալի արդյունք է ու խոստումնալից սկիզբ ծանրամարտում մեր վաղվա օրվա: Ուշագրավ փաստ է նաև այն, որ ընդգրկուն է եղել մեր տղաների մարզադպրոցների աշխարհագրությունը` Երևան, Էջմիածին, Վանաձոր, Գյումրի, Քասախ: