«Փակ շուկայի» ներսում` շինարարություն, դրսում` բողոքի ակցիա (ֆոտո)

Այսօր Փակ Շուկայի դիմացը կրկին մարդաշատ էր: Այնտեղ էին հավաքվել «Ազատագրենք հուշարձանն օլիգարխից» հասարակական շարժման նախաձեռնող խմբի անդամները, ովքեր պահանջում են դադարեցնել պատմամշակութային հուշարձանի աղճատումը, և ԱԺ ՀՀԿ խմբակցության պատգամավոր Սամվել Ալեքսանյանի կողմնակիցները, ովքեր պահանջում են շուկայի վերաբացումը:

«Ազատագրենք հուշարձանն օլիգարխից» շարժման անդամները Մաշտոցի պողոտայից երթով էին հասել Փակ Շուկայի մոտ, այնուհետև կանգնել շուկայի դիմացի մայթին: Այդ ընթացքում շուկայի մոտ էին նաև Ալեքսանյանի կողմնակիցները, ովքեր բավականին լավ պատրաստված էին եկել ակցիային` «Ո′չ գրանտակերներին», «Ո′չ օտարերկրյա լրտեսներին», «Դուք դեմ եք 700 աշխատատեղերի բացմանը» գրությամբ պաստառներով և դրոշներով:

Նշենք, որ շուկային հատվածից դեռևս չի հեռացվել Կարո Եղնուկյանի նկարով մեծադիր պաստառը, որի վրա գրված է` «մասոն»: Հիշեցնենք, որ Եղնուկյանը պաստառի հեռացման պահանջով արդեն իսկ դիմել է ոստիկանապետին և գլխավոր դատախազին:

Ակցիայի ընթացքում շինարարությունը շարունակվում էր: Աշխատանքներ էին տարվում հատկապես շենքի ճակատային հատվածում: