«Դե թողե′ք գնամ տուն». Դատախազը տուն գնաց (ֆոտո)

Այսօր ՀՀ Գլխավոր դատախազ Աղվան Հովսեփյանը համբուրեց դատախազության գլխավոր մուտքի դուռը, խոնարհվեց և դրսում հավաքված աշխատակիցներին մեկ առ մեկ հաջողություն մաղթեց:

«Շնորհակալ եմ Աստծուն, ճակատագրին, որ ինձ բախտ է վիճակվել իմ մասնագիտությամբ զբաղեցնել այդպիսի բարձր պաշտոն, ծառայել իմ պետականությանը, հայրենիքին, և այդ տարիների ընթացքում, վկա է Աստված, արել եմ ամեն ինչ, որպեսզի համակարգը կայանա, և բոլոր խնդիրները, որոնք դրված են եղել դատախազության համակարգի առջև, լուծվեն արդարադատության, օրենսդրության սահմաններում: Ուզում եմ իմ շնորհակալությունը հայտնել հայ ժողովրդին, իմ բոլոր ընկերներին, կառավարությանը, Ազգային ժողովին, իմ բոլոր գործընկերներին, միջազգային կառույցների ղեկավարներին, արտասահմանյան գործընկերներիս, իմ ընտանիքի անդամներին, Ձե′զ, հարգելի′ լրագրողներ, որ այդ տարիների ընթացքում, իսկ այդ պաշտոնավարությունը եղել է շատ ծանր դժվար տարիների ժամանակահատվածում, Ձեր օգնությամբ ու բոլորի օգնությամբ ես հնարավորություն եմ ունեցել կատարել իմ պարտականությունները` որպես գլխավոր դատախազ: Շնորհակալություն եմ հայտնում»,- ասաց Հովսեփյանը:

Վերջինս չմեկնաբանեց, թե ինչու երկրորդ անգամ չվերանշանակվեց, չխոսեց նաև ինչ աշխատանքի մասին:

Այնուհետև խնդրեց, որ լրագրողներն իրեն թողնեն` գնա տուն.

«Դե թողե′ք գնամ տուն»,- ասաց արդեն նախկին դատախազը: