Այսօր գուսան Շահենի ծննդյան օրն է (տեսանյութ)

Գուսան, բանաստեղծ, պատմագիր Շահեն Սարգսյանը ծնվել է 1909 թ. սեպտեմբերի 14-ին Շիրակի մարզի Դուրդուբուլաղ գյուղում (այժմ` գ. Կրասար):

1937-1941 թթ եղել է մեներգիչ Հայֆիլհարմոնիայի երգի և պարի անսամբլում:

- Եղել է Թ. Ալթունյանի անվան երգի-պարի պետական անսամբլի հիմնադիրներից:

- 1982 թվականին Գյումրիում հիմնադրել է աշուղական դպրոց, կազմել «Աշուղական տաղաչափական» դասագիրք:

- Մասնակցել է Հայրենական Մեծ Պատերազմին:

- Սովորել է Կոմիտասի անվան պետական կոնսերվատորիայի դասական վոկալ բաժնում: Եղել է Իգոր Մոիսեևի ԽՍՀՄ երգի-պարի պետական անսամբլի մեներգիչը: Հիմնադրել է ««Շահենի քնար», «Երևան», «Շիրակ» աշուղական երգի անսամբլները:

- Մասնակցել է տարբեր մրցույթների, Բաքվում կայացած աշուղական համագումարների, աշուղ Ալիի 180 ամյակին, չնախատեսված մրցույթի ընթացքում հաղթել է 500 աշուղի:

Գրել է ավելի քան 300 քնարական երգեր (5000 անուն տարբեր ժանրերի ստեղծագործություններ), «Էլինար» պոեմը, «Հերիքնազ» երաժշտական պատկերը, «Սառա» սիրավեպ-երգաշարը, «Սասնա Դավթի ու Մսրա Մելիքի մենամարտը» դյուցազներգությունը: Նրա ստեղծագործության վրա մեծ ազդեցություն են ունեցել Շիրակի ժողովրդական երգարվեստի հարուստ ավանդույթները: Ժողովրդականություն են վայելում «Սասնա ծուռ», «Ալմաստը շողում է». «Խռոված էր», «Թուխ մազերուդ», «Անծանոթ սեր», «Նաիրյան դալար բարդի», «Անցա, գնացի», «Կոմիտաս» և այլ երգեր:

Ունի ուսումնասիրություններ աշուղների, հին գուսաներգության, պատմագիտության, տիեզերագիտության և ժողովրդական բժշկության ասպարեզներում:

- Շահենի տոհմում հայտնի անուններ են աշուղներ Սիաին, Ավագը, Պոտոն, Արթենի Ալեքը, որոնց մոտ էլ սովորել է և աշուղի կոչում ստացել: Պապի՝ Սարգսի, հոր` Եղիազարի և մորաքրոջ՝ հայդուկ Սալվիի անուններին հանդիպում ենք զորավար Անդրանիկի ջոկատում` Առաքելոց Վանքի մարտի օրերին: Հայրը զինվորական սպա էր Առաջին աշխարհամարտի տարիներին, իսկ հայդուկ Սոսեն` հայդուկապետ Սերոբ Աղբյուրի կինը` տալվորիկցի Ատլաս տատի քույրն էր: Անշուշտ, այս ամենն իր հետքը թողել է ականավոր գուսանի կյանքի և ստեղծագործական նկարագրի վրա:

- Գուսան Շահենը մահացել է 1990 թվականին: