Փաստաբանների պալատի նախագահի ընտրություններն ընթանում են բնականոն հունով

Այսօր՝ սեպտեմբերի 14-ին, ՀՀ փաստաբանների պալատում Պալատի նախագահի ընտրություններ են:

Ժամը 11.00-ի դրությամբ` ընտրություններն ընթանում են բնականոն հունով, 1370 ընտրողներից քվեարկությանը մասնակցել է շուրջ 200-ը:

Քվեարկությանը արդեն մասնակցել են ՀՀ փաստաբանների պալատի գործող նախագահ Ռուբեն Սահակյանը, թեկնածուներ Տիգրան Աթանեսյանը և Կրոմվել Գրիգորյանը: 

Փաստաբանների պալատի նախագահ Ռուբեն Սահակյանը լրագրողների հետ զրույցում ասաց, որ լավ է տրամադրված այս ընտրություններին, ինքն անգամ պատրաստ է շնորհավորել ընտրված թեկնածուին: Հույս հայտնեց նաև, որ նորընտիր ՓՊ նախագահը կարող է վերացնել առկա թերությունները:

Ինչպես գիտենք, երեկ ՀՀ գլխավոր դատախազ Աղվան Հովսեփյանն իր պաշտոնից հեռանալիս համբուրեց դատախազության գլխավոր դուռը, խոնարհվեց, նոր հեռացավ։ Այսօր լրագրողներից մեկը հարցրեց Ռուբեն Սահակյանին` արդյոք ինքն էլ է պատրաստվում հեռանալու դեպքում համբուրել դուռը, վերջինս պատասխանեց՝ «Ես միայն եկեղեցու դուռն եմ համբուրում»:

Ընտրություն կատարած Կրոմվոլ Գրիգորյանին ևս նույն հարցը տվեցին: Փաստաբանը նկատում է, որ դատախազությանն է հարիր դուռը համբուրել, իսկ փաստաբաններին՝ ոչ։