«Ռուսաստանը կարող է կարգավորել Ղարաբաղյան հիմնախնդիրը միայն իր օգտին, ոչ թե Հայաստանի». ռուս փորձագետ

«Ով է ավելի շատ շահել Հայաստանի՝ Մաքսային միությանը միանալով: Հայաստանը թե Ռուսաստանը: Հարցն արժե դիտարկել երկու տեսանկյունից՝ քաղաքական և տնտեսական: Քաղաքական առումով շահել է Ռուսաստանը, իսկ տնտեսական՝ Հայաստանը: Այնուամենայնիվ, ժամանակը ցույց կտա»: Այդ մասին Vesti.Az-ի հետ զրույցում ասել է ռուս փորձագետ, Քաղաքական փորձագիտական խմբի ղեկավար Կոնստանտին Կալաչեվը:

Փորձագետի կարծիքով` Հայաստանն ունի Ղարաբաղի հոգսը:

«Ռուսաստանը ստատուս-քվո-ի երաշխիքն է: Հայաստանի այժմյան քաղաքական գործիչների սերունդի դեպքում երկիրը կպահպանի պրոռուսական կողմնորոշումը: Թե ինչ կլինի հետագայում, կախված է մի շարք նախադրյալներից: Հայաստանի հնարավորությունների միջանցքը շատ նեղ է: Ադրբեջանի հետ հարաբերությունները սահմանափակող ուժերից մեկն են», -նշել է փորձագետը:

Կալաչեվը համարում է, որ Հայաստանին Ռուսաստանից հնարավոր կլիներ  պոկել միայն այն դեպքում, երբ Հայաստանի և Ադրբեջանի ղեկավարությունը պատրաստակամություն հայտներ փոխզիջումների գնալ բանակցությունների սեղանի շուրջ, «կամ եթե Ադրբեջանը հրաժարվեր Ղարաբաղի հարցը ուժով կարգավորելու հնարավորությունից: Բայց Ադրբեջանն այդ քայլին չի գնա: Բնականաբար, Մաքսային միությանը Հայաստանի միացումը և հետխորհրդային տարածքում ինտեգրացիոն գործընթացներին մասնակցությունը ենթադրում էին, որ Ռուսաստանը պետք է հասկանա Ղարաբաղյան հարցի կարևորությունը Հայաստանի համար: Ռուսաստանը Հայաստանին չի հանձնի»:

Իր հերթին ուկրաինացի քաղաքագետ, «Ուկրաինական քաղաքականություն» հիմնադրամի նախագծերի ղեկավար Ալեքսեյ Վորոնենկոն վստահ է, որ Հայաստանի՝ Մաքսային միությանը միանալուց շահել է Ռուսաստանը:

«Հայաստանը վաղուց է հրաժարվել սեփական աշխարհաքաղաքական դիրքորոշումից և հանդիսանում է Մոսկվայի արբանյակը: Հայաստանի՝ Մաքսային միություն մուտք գործելը միայն ժամանակի հարց էր: Ի պատասխան, իհարկե, Երևանը սպասում է Մոսկվայի հետագա քայլերին ղարաբաղյան հարցի հետ կապված: Որ Ղարաբաղի անգամ մի մասը չանցնի պաշտոնական Բաքվին: Հաշվի առնելով այն, որ Ղազախստանը պատրաստվում է դուրս գալ Մաքսային միությունից, Հայաստանի մուտքը շատ ձեռնտու է Ռուսաստանին: Կարծում եմ, Հայաստանը չպետք է լուրջ հույսեր կապի այդ միության հետ», -համարում է Վորոնենկոն:

Վորոնենկոյի կարծիքով` Ղարաբաղյան հարցի կարգավորումը կախված է ոչ միայն Ռուսաստանից, այլև Եվրամիությունից և ԱՄՆ-ից:

«Ռուսաստանը կարող է կարգավորել Ղարաբաղյան հիմնախնդիրը միայն իր օգտին, ոչ թե Հայաստանի», -եզրափակել է նա: