Այսօր դերասան, սցենարիստ Արամաշոտ Պապայանի ծննդյան օրն է

Դերասան, սցենարիստ Արամաշոտ Պապայանը ծնվել է 1911 թ. սեպտեմբերի 15-ին՝ Բաթումիում: Սովորել է Դոնի Ռոստովի մանկավարժական ինստիտուտում: Այս մասին գրել է avproduction.am–ը։ 1931-40 թթ. աշխատել է Հյուսիս-Կովկասյան հայկական պետթատրոնում՝ որպես դերասան, 1940-42 թթ.՝ Աշտարակի թատրոնում, ապա բանակում ծառայելուց հետո՝ Կիրովականի և Վաղարշապատի թատրոններում:

Ավարտել է Երևանի մարքսիզմ-լենինիզմի համալսարանը, Մոսկվայի Մ. Գորկու անվան գրականության ինստիտուտին կից գրական բարձրագույն դասընթացները: Նրա առաջին դրաման է «Երազը», երկրորդը՝ «Մեր կռիվն արդար է»: Եղբորորդու՝ դրամատուրգ Արամ Պապայանի հետ գրել է «Մեծ հարսանիք» կատակերգությունը, «Սեր առանց խարդավանքի», «Բախտավորյալները» պիեսները: Գրել է նաև շատ դրամաներ, որոնք բեմադրվել են տարբեր բեմերում:

Նրա սցենարներով «Հայֆիլմ» կինոստուդիան նկարահանել է ֆիլմեր: Պարգևատրվել է բազմաթիվ շքանշաններով ու մրցանակներով: Եղել է ԽՍՀՄ գրողների միության անդամ: Արժանացել է ՀԽՍՀ արվեստի վաստակավոր գործչի կոչմանը: Մահացել է 1998 թ. նոյեմբերի 26–ին, Երևանում: