Հայ երգի մեծ վարպետ Վաղարշակ Սահակյանի ծննդյան օրն է (տեսանյութ)

Երգիչ Վաղարշակ Սահակյանը ծնվել է 1906 թ. սեպտեմբերի 15-ին, Իրանի Սալմաստ գավառի Փայաջուկ գյուղում: Ավարտել է տեղի ծխական դպրոցը, ապա սովորել է Թիֆլիսի քաղաքային ուսումնարանում, որն ավարտելուց հետո մեկնել է Ամասիա և աշխատել` որպես ֆինբաժնի վարիչ: Հետագայում տեղափոխվել է Լենինական, որտեղ սովորել է երաժշտական ստուդիայում, աշակերտել Նիկողայոս Տիգրանյանին, երգել է ռադիոյում, իսկ 1933 թվականից հաստատվել է Երևանում, որտեղ սկսել է երաժշտական գործունեությունը Վարդան Բունու ղեկավարությամբ գործող արևելյան նվագարանների անսամբլում, ապա երկու տարի հանդես է եկել որպես Հայֆիլհարմոնիայի մենակատար: Կատարել է Սայաթ-Նովայի, Ջիվանու, Շերամի և այլոց ստեղծագործությունները: Երիտասարդ երգչին լսել ու բարձր են գնահատել Եղիշե Չարենցը, Շարա Տալյանը: Վերջինս նրան հրավիրել է աշխատելու 1936 թ. ստեղծված Սայաթ-Նովայի անվան գուսանական և աշուղական երգի անսամբլ, որի հետ էլ կապվեց նրա ստեղծագործական գործունեության մեծ մասը: 1942 թվականից եղել է երաժշտական համույթի գեղարվեստական ղեկավարը, որն այդ շրջանում ունեցել է շուրջ 10 հազար համերգ, երկրորդ աշխարհամարտի դժվարին տարիներին հանդես է եկել ռազմաճակատում: 1945 թ. արժանացել է ՀԽՍՀ ժողովրդական արտիստի կոչմանը: Մահացել է 1978 թ. ապրիլի 24-ին, Երևանում:

avproduction.am