Սերժ Սարգսյանի 4-րդ գալուստը

Վերլուծական 16 Սեպտեմբեր, 2013 17:36

Վերջին օրերին լրատվամիջոցներում շատ է արծարծվում Սերժ Սարգսյանի՝ երրորդ անգամ նախագահ «ընտրվելու» թեման: Իհարկե, նորություն չէ ֆանտաստիկայի ժանրի նկատմամբ հայերիս մեծ հետաքրքրությունը, բայց նորություն չէ նաև, որ ֆանտաստիկան մի օր կարող է նաև իրականություն դառնալ, ուստի հրապարակումներն իրենց էությամբ չարագույժ են:

Իսկ երևակայության աշխատելու տեղիք կարող է տալ ամեն մի մանրուք. օրինակ՝ Ադրբեջանում նախագահի ընտրությունների հետ կապված` Սերժ Սարգսյանն ասել էր, թե իր համար նախընտրելի թեկնածուն Ալիևն է: Այստեղ արդեն շատերը երևակայել էին, թե Սերժ Սարգսյանն այդպիսով արտահայտում է իր ցանկությունը՝ Ալիևի նման երրորդ անգամ նախագահ «ընտրվել»: Բայց հնարավոր է չէ՞, որ նման բան լինի, չէ՞ որ Սերժ Սարգսյանի նման մարդը չի կարող փոքր ախորժակի տեր լինել: Նաև պետք է հաշվի առնել, որ Հայաստանում բարձրաստիճան պաշտոնյաների մեջ աթոռապաշտության ձևավորված մշակույթ կա և երկրի իշխանության գլխավոր աթոռները զբաղեցնողներին նույնիսկ «շպակլիով» դժվար է իրենց աթոռներից «քերել»: Նրանց որ մնա, հետմահու էլ կմնան իրենց աթոռներին գամված: Այս համատեքստում 2018-ից հետո էլ աթոռը պահպանելու սրբազան նպատակը տրամաբանորեն պետք է որ լինի:

Եվ հիմա առաջիկայում սահմանադրական բարեփոխումներ են լինելու, ինչը կարող է հնարավորություն տալ ինքնահռչակ նախագահին՝ իրականացնելու ցանկությունը: Ու որքան էլ մեր որոշ պատգամավորներ ու հանրության բազմաթիվ ներկայացուցիչներ անիրատեսական համարեն սուլթանական երկրի մոդելի կիրառումը Հայաստանում, այդուհանդերձ, պետք է գիտակցենք, որ Հայաստանում այսօր նունիսկ ֆիզիկայի օրենքներից շեղումներն են հնարավոր, ներկա համակարգն այդ հնարավորությունները ստեղծել է:

Ըստ էության, Սերժ Սարգսյանի 4-րդ գալուստը, որքան էլ անհավատալի է, բացառված չէ: Իսկ ինչո՞ւ 4-րդ, որովհետև առաջինը 2008-ին էր, որն ամրագրվեց Մարտի 1-ի արյունալի դեպքերով, այնուհետև՝ քրեաօլիգարխիկ համակարգի բարգավաճմամբ, ընդդիմության որակազրկմամբ, տնտեսության կազմաքանդմամբ, ատկատներով, օֆշորներով, չնայած եղան նաև ձեռքբերումներ. օրինակ` գյուղատնտեսության ոլորտում կատարվեցին նորամուծություններ՝ թարս աճած խիարների տեսքով, գիտություններից զարգացավ բանահյուսությունը, շրջանառության մեջ դրվեցին «Եկել ես ստեղ, որ ինչ անես» և «Տատի խրատները» ավանդապատումների շարքերը:

Առաջին գալստյան օրոք երկրում ամրապնդվեց գաղջ մթնոլորտը, որն ավելի գաղջացավ 2-րդ գալուստից հետո՝ 2013-ին: 3-րդ գալուստը առկա էր նաև 1-ինի և 2-րդի ժամանակ, և նրան հնարավոր է համարել նաև առաջին կամ երկրորդ կամ նույնիսկ տասներկուերորդ, քանի որ նա կլինի դեռ շատ երկար: Խոսքս Սահակյան Գալուստի մասին է:

Փաստորեն, 2018-ին կարող է լինել Սերժ Սարգսյանի 4-րդ գալուստը: Թե ինչպիսին այն կարող է լինել, մնում է միայն ենթադրել:

Կարեն Վարդանյան