Անտերության մատնված գյուղացիներն ու «խիստ ծանրաբեռնված» պատգամավորը

Օրեր առաջ Լուրեր.com-ի խմբագրություն էին զանգահարել Տավուշի մարզի Բագրատաշեն գյուղի մի խումբ բնակիչներ: Վերջիններս իրենց դժգոհությունն էին հայտնել առ այն, որ Բագրատաշեն գյուղում ապօրինի փակվում է ինքնահոս ոռոգման ջուրը: Նրանց խոսքերով՝ ջրմուղի պետը խոստացել է հանդիպել իրենց հետ, քննարկել խնդիրը, սակայն հանդիպումը դեռ տեղի չի ունեցել, իսկ գյուղի բնակիչներն ինքնուրույն խնդրին լուծում տալ չեն կարողանում:

Մեզ հետ զրույցում գյուղացիներից մեկը նշեց, որ իրենք բազմիցս փորձել են կապ հաստատել անգամ թիվ 40 ընտրատարածքից (որն ընդգրկում է նաև Բագրատաշեն գյուղը) մեծամասնական ընտրակարգով պատգամավոր ընտրված Մարինե Մարաբյանի հետ՝ նրանից որևէ կերպ աջակցելություն ստանալու համար, սական վերջինիս գտնել չեն կարողացել:

Լուրեր.com-ը զրուցել է նաև գյուղի գյուղապետ Արկադի Մակյանի հետ, տեղեկացել, որ ըստ Ջրմուղի՝ գյուղի բնակիչներից ոմանք ոռոգման ջրի պարտքեր ունեն, սակայն, ըստ գյուղապետի, թե´ գյուղացիները և թե´ նրանց խնդիրները պատկան մարմիններին չեն հուզում:

Ըստ Մակյանի` պետական օղակների կողմից գյուղը մատնված է անտարբերության: Գյուղապետը նշել է նաև, որ ինքն անձամբ է փորձել կապ հաստատել թիվ 40 ընտրատարածքի պատգամավորի հետ, սակայն փորձերն անցել են ապարդյուն:

Մենք ևս մի քանի օր շարունակ փորձեցինք գտնել պատգամավոր Մարաբյանին, անգամ կապ հաստատեցինք ԱԺ մամուլի ծառայության հետ, սակայն վերջիններս ևս որևէ կոնտակտ չունեին պատգամավորուհուց:

Մեզ հաջողվեց գտնել պատգամավորի ԱԺ աշխատասենյակի հեռախոսահամարը, որը, որքան էլ զարմանալի է, ողջ ընթացքում «խիստ ծանրաբեռնված էր»՝ այնպես, ինչպես իր ընտրատարածքի բնակիչների հոգսերով «զբաղված» Մարաբյանը:

Հաշվի առնելով այն հանգամանքը, որ մի ամբողջ լրատվամիջոց օրեր շարունակ չկարողացավ կապ հաստատել ՀՀԿ խմբակցության պատգամավորուհու հետ, հասկանալի է արդեն, որ գյուղացիներն ավելի քան չեն կարողանա գտնել նրան, և նրանց վրդովմունքը տեղին է:

Հարկ է նշել նաև, որ Բագրատաշենի բնակիչներից մեկը մեզ հետ զրույցում ասել է, որ եթե խնդրին հրատապ լուծում չտրվի, իրենք պատրաստվում են փակել միջպետական ճանապարհը:

Մնում է միայն հուսալ, որ անհասանելի պատգամավորն ու պատկան մարմիններն ավելի շտապ կարձագանքեն խնդրին, քան անտերության մատնված բնակիչները կփակեն միջպետական ճանապարհը:

Գայանե Համբարձումյան