Հայաստանի եվրոպական ապագայի դպրոց. ավարտվեց երկրորդ փուլը

Սեպտեմբերի 13-15-ը Աղվերանում Կոնրադ Ադենաուեր հիմնադրամի և Երիտասարդ առաջնորդների դպրոցի կողմից կազմակերպվել է «Հայաստանի Եվրոպական ապագայի դպրոցի» եռօրյա դասընթացը, որով եզրափակվել է ծրագրի արդեն իսկ երկրորդ փուլը։

Սեպտեմբերի 3-ին Հայաստանի՝ Մաքսային միությանն անդամակցելու որոշման մասին ՀՀ նախագահի հայտարարությունից և եվրոպական կազմակերպությունների արձագանքից հետո ՀՀ արտաքին քաղաքական վեկտորների և ինտեգրացիոն գործընթացների քննարկումն առավել քան արդիական և կարևոր էր։ Սեմինարին ուսանողները հնարավորություն ստացան ՀՀ պետական պաշտոնյաների, իշխանության և ընդդիմության ներկայացուցիչների, ԵՄ պաշտոնյաների, այդ թվում՝ ՀՀ-ում ԵՄ պատվիրակության ղեկավար Տրայան Հրիստեայի և փորձագետների հետ քննարկել ինտեգրացիոն գործընթացները, դրանք պայմանավորող գործոններն ու հետագա զարգացման ուղիները։

Հարցերն ու քննարկվող թեմաները բազմազան էին, բայց կառուցված էին միևնույն մտահոգությունների և զարգացման տեսլականների վրա։ Քննարկվեց սեպտեմբերի 3-ի հայտարարության արդյունքը, դրդապատճառներն ու հնարավոր հետևանքները։ Մեծ ուշադրություն հատկացվեց Ասոցացման համաձայնագրերի ճակատագրի, ԵՄ-ի հետ հարաբերությունների կառուցման հետագա ուղիների, տնտեսական հարթության փոփոխություններին։

Բացման խոսքով հանդես եկավ Կոնրադ Ադենաուեր հիմնադրամի տարածաշրջանային ծրագրերի տնօրեն Ջանան Աթիլգանը։ Սեմինարի առաջին օրը դասախոսությամբ ներկայացավ Կովկասի ինստիտուտի տնօրեն Ալեքսանդր Իսկանդարյանը։ Նա ներկայացրեց ՀՀ հարաբերությունները ՌԴ-ի և ԵՄ-ի հետ, վերլուծեց ինտեգրացիոն գործընթացների արդյունքն ու ներկայացրեց ապագայի իր տեսլականը։ Զեկույցով հանդես եկավ նաև ԵՄ խորհրդատվական խմբի ներկայացուցիչ Իլմար Սոլիմզը, ով ներկայացրեց խորհրդարանի դերը եվրաինտեգրման գործընթացում, մասնավորապես՝ անդրադարձավ Լատվիայի օրինակին՝ եվրաինտեգրման ճանապարհին անցած փուլերին և կարևոր բացթողումներին ու ձեռքբերումներին։ Այդ գործընթացում հատկապես կարևորվեց թափանցիկության մեծացումն ու քաղաքացիական հասարակության հետ կապերի սերտացումը։

Երկրորդ օրը դասախոսությամբ հանդես եկավ ՀՀ ԱԺ արտաքին հարաբերությունների մշտական հանձնաժողովի նախագահ, պատգամավոր, Արտակ Զաքարյանը, ով խոսեց ԵՄ-ՀՀ հարաբերությունների, դրանցում վերջին զարգացումների և եվրոպական արձագանքների մասին։ Դասախոսությամբ հանդես եկավ նաև Կովկասի Ինստիտուտի փորձագետ Սերգեյ Մինասյանը։ Նա խոսեց զարգացման Հայաստանյան հեռանկարների, Մաքսայի միության և ԽՀԱԱՀ-ի մասին։ Անդրադարձ կատարվեց նաև տարածաշրջանային ռազմաքաղաքական զարգացումներին։

ԵԱՀԿ ռազմաքաղաքական ծրագրերի համակարգող Դավիթ Հարությանյանն առավել մանրամասն անդրադարձ կատարեց գործընթացների տնտեսական կողմին։ Հանգամանորեն քննարկվեցին ԵՄ-ՀՀ տնտեսական հարաբերություններն ու ԽՀԱԱՀ հիմքում ընկած սկզբունքները։

Երրորդ օրը սեմինարի մասնակիցների հետ զեկույցներ և քննարկումներ են անց կացրել ՀՀ ԱԺ պատգամավոր Ալեքսանդր Արզումանյանը և «Ժառանգություն» կուսակցության վարչության անդամ Ստեփան Սաֆարյանը։ Նրանք խոսել են ԵՄ –Հայաստան հարաբերություններին այլընտրանքի գոյության հնարավորության, Հայաստանի ընտրության, գործընթացների պատճառների և հետևանքների մասին։ Բացի այդ, բանախոսներն անդրադարձան հայաստանյան քաղաքական ուժերի արձագանքներին։

ՀՀ ԱԺ Պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը ներկայացրել է ՆԱՏՕ-ի հետ ՀՀ հարաբերությունները, անվտանգության ոլորտում ՀՀ քաղաքականությունը, տարածաշրջանային հարաբերությունները և այլն։

Սեմինարը եզրափակել է ՀՀ-ում ԵՄ պատվիրակության ղեկավար Տրայան Հրիսթեան, ով անդրադարձել է սեպտեմբերի 3-ին ՀՀ նախագահի հայտարարությանը եվրոպական արձագանքին, ներկայացրել ՀՀ-ԵՄ հարաբերությունների հետագա կառուցման տեսլականը, վերահաստատել ընդհանուր արժեքների, կանոնների վրա հիմնված այդ հարաբերությունները շարունակելու և ձեռքբերումներն ամրապնդելու անհրաժեշտությունը։

Սեմինարի մասնակիցները մշակել և ներկայացրել են նաև եվրաինտեգրման գործընթացների ներքո եվրոպական արժեքների տարածմանն ուղղված իրենց նախագծերը։