«Հրապարակ». Մեդալներ բաշխելու հիվանդությունը ՊՆ էլ հասավ

Մեդալներ բաշխելու հիվանդությունը պաշտպանության նախարարություն էլ հասավ: Երեկ Սեյրան Օհանյանը մեդալներ է տվել մի շարք լրագրողների՝ ՊՆ 20-ամյակի առիտով: ՊՆ մամուլի խոսնակ Դավիտ Տոնոյանից «Հրապարակ» թերթի թղթակիցը փորձել է ճշտել, թե ինչու է ՊՆ-ն մեդալներ շնորհում և ինչ սկզբունքով:

«Կան մարդիկ, որոնք օբյեկտիվորեն են քննադատում, ոչ թե չարախոսում ու շահարկումներով են զբաղվում, ու մենք խնամքով ենք ընտրել, բայց դա ամբողջական ցանկը չէ»,- ասել է խոսնակը, թերևս չարախոսողների թվում ակնարկելով թերթին: Ասել է թե՝ մեդալ չստացածները չարախոսողնե՞րն են՝ հարցրել է թերթի թղթակիցը: «Չէ, մի մասին ենք պարգևատրել, մյուս մասին ընթացքում կպարգևատրենք», -«Հրապարակ»-ի թղթակցին հուսադրել է խոսնակը: