Գյուղնախարարը աշխատակցուհիներին պարտադրել է նախագահի հետ հանդիպմանը ներկայանալ մազերը ներկած և դիմահարդարված

Ուրբաթ օրը՝ սեպտեմբերի 13-ին, նախագահ Սերժ Սարգսյանն այցելել է Գյուղատնտեսության նախարարություն, շրջել աշխատասենյակներում, ծանոթացել նախարարության աշխատակիցների աշխատանքային պայմաններին: Նախագահն առանձին հանդիպում է ունեցել նաև ղեկավար անձնակազմի՝ փոխնախարարների, վարչությունների և առանձնացված ստորաբաժանումների ղեկավարների հետ:

Գյուղնախարարությանը մոտ կանգնած Lurer.com-ի աղբյուրները հայտնել են հետաքրքիր տեղեկություններ այցին նախորդած իրադարձությունների մասին: Նախքան Սերժ Սարգսյանի այցը, գյուղնախարար Սերգո Կարապետյանն իր մոտ է հրավիրել նախարարության բոլոր բաժինների աշխատակիցներին և պարտադրել, որ յուրաքանչյուրը նորոգի իր աշխատասենյակը: Նախարարը պահանջել է, որ նախարարության աշխատակից բոլոր աղջիկները հանդիպմանը ներկայանան մազերը ներկած, դիմահարդարված, ինչպես նաև պարտադիր կրեն ոսկյա զարդեր: Սերգո Կարապետյանը պահանջել է, որ նախագահի հարցերին ի պատասխան՝ միայն լավ բաներ խոսեն և խնդրահարույց որևէ հարց չբարձրաձայնեն:

«Անպայման ստուգելու եմ, որ իմ հրահանգներից շեղումներ չլինեն»,- շեշտել է նախարարը: