«Արհեստների և արվեստների փառատոն» Գյումրիում

Սեպտեմբերի 18-ին ՀՀ էկոնոմիկայի նախարարությունում տեղի ունեցավ ասուլիս` նվիրված Գյումրի քաղաքում սեպտեմբերի 20-ին անցկացվելիք «Արհեստների և արվեստների» փառատոնին:

Ասուլիսի բանախոսներն էին ՀՀ էկոնոմիկայի նախարարության զբոսաշրջության վարչության պետ Մեխակ Ապրեսյանը, «Արենի Փառատոն» հիմնադրամի տնօրեն Նունե Մանուկյանը, ԱՄՆ ՄԶԳ Ձեռնարկությունների զարգացման և շուկայի մրցունակության /USAID/EDMC/ ծրագրի փորձագետ Արմինե Իսրայելյանը:

«Արենի Փառատոն» հիմնադրամը ՀՀ էկոնոմիկայի նախարարության, ՀՀ մշակույթի նախարարության, ՀՀ տարածքային կառավարման նախարարության, Հայաստանի Համայնքների միության, ԱՄՆ ՄԶԳ Ձեռնարկությունների զարգացման և շուկայի մրցունակության ծրագրի, Շիրակի մարզպետարանի և Գյումրու քաղաքապետարանի աջակցությամբ, սեպտեմբերի 20-ին առաջին անգամ կազմակերպում է «Արհեստների և արվեստների փառատոն»:

Փառատոնի կազմակերպման նպատակն է`

• նպաստել հայկական զբոսաշրջային արդյունքի դիվերսիֆիկացման, համայնքներում զբոսաշրջության զարգացման, համաչափ տարածքային տնտեսական զարգացման պետական քաղաքականության խնդիրների իրականացմանը,

• նպաստել Գյումրիում և շրջակա համայնքներում ավանդույթների վերականգնմանը, պահպանմանն ու զարգացմանը,

• նպաստել Գյումրին և շրջակա համայնքների պատշաճ ներկայացմանը ներքին և միջազգային զբոսաշրջային շուկաներում

• փառատոնը դարձնել ամենամյա, ավանդական, ճանաչելի ներքին և միջազգային զբոսաշրջային շուկաներում:

Փառատոնի ընթացքում նախատեսվում են մի շարք հետաքրքիր միջոցառումներ:

- Քանդակագործների աշխատանքային գործընթացի ներկայացում

- Դարբինների, ոսկերիչների և հյուսների աշխատանքների ցուցադրություն

- բրուտագործության, ասեղնագործության, գորգագործության աշխատանքների ցուցադրություն

- Մասնակցություն «Արտ Էքսպո» ցուցահանդեսին, որտեղ ներկայացված կլինեն Հայաստանի տարբեր մարզերը` իրենց բնորոշ արվեստներով և արհեստներով

- Հումորի վարպետների և ժողովրդական համույթների կատարումներ - Ավանդական ուտեստների ներկայացում և վաճառք
- Բացօթյա համերգ